სასახლის ღობის საქმეზე გამოტანილ პირველ განაჩენს “ოპოზიციის ალიანსი” საგანგებო განცხადებით ეხმაურება

სასახლის ღობის საქმეზე გამოტანილ პირველ განაჩენს “ოპოზიციის ალიანსი” საგანგებო განცხადებით ეხმაურება.

ამ საქმეზე დაკავებული ყველა პირი არის პოლიტიკური პატიმარი და დღევანდელი გადაწყვეტილება მხოლოდ რეჟიმის პასუხისმგებლობას ამძიმებს – ვკითხულობთ წერილში.

ერთი მიზნის გარშემო გაერთიანებული პოლიტიკური ლიდერები საზოგადოებას ერთიანობისკენ მოუწოდებენ. ალიანსი მხარდამჭერებს ახსენებს, რომ ბრძოლის მთავარი გზა მშვიდობიანი პროტესტია და სწორედ ამიტომ 26 მაისს, დამოუკიდებლობის დღეს, ყველას რუსთაველის გამზირზე ელოდებიან.

“4 ოქტომბერს დაკავებულების მიმართ დღეს გამოტანილი განაჩენი არ არის მართლმსაჯულების აქტი. ეს არის რეჟიმის მიერ გაფორმებული პოლიტიკური ანგარიშსწორება, რომელსაც სამართალთან საერთო არაფერი აქვს.
ყველა დაკავებული პირი არის პოლიტიკური პატიმარი და დღევანდელი გადაწყვეტილება მხოლოდ რეჟიმის პასუხისმგებლობას ამძიმებს.
ამ უკანონობასთან ბრძოლის ჩვენი მთავარი გზა მშვიდობიანი პროტესტია!
სწორედ ამიტომ, 26 მაისს, დამოუკიდებლობის დღეს, ვიკრიბებით რუსთაველის გამზირზე.
ეს არის ბრძოლა ჩვენი მოქალაქეების თავისუფლებისთვის.
გელოდებით ყველას 26 მაისს, 19:00 საათზე გამარჯვებისთვის – ერთად, ბოლომდე! “- ნათქვამია განცხადებაში.

სასახლის ღობის საქმეზე პაატა ბურჭულაძეს, მურთაზ ზოდელავას, ირაკლი ნადირაძეს, ლაშა ბერიძეს და პაატა მანჯგალაძეს 7-7 წლით, თორნიკე მჭედლიშვილს, ნიკა გვენცაძეს, ირაკლი ჩხვირკიას 5-5, ხოლო ირაკლი შაიშმელაშვილს 2 წლით თავისუფლების აღკვეთა მიესაჯათ.