მოწმეებზე ზეწოლასა და ჩვენების შეცვლის იძულებაში ადვოკატი სულეიმან ისამილოვია მხილებული. მის წინააღმდეგ გამოძიების დაწყების მოთხოვნით პროკურატურას თაზო მთივლიშვილის მკვლელობის საქმეზე ბრალდებულმა მიმართა.
საქმის ერთ-ერთი მთავარი მოწმე — არასრულწლოვანი გოგონა, რომელსაც გამოძიების „ოქროს მოწმედ“ მოიხსენიებენ, ამტკიცებს, რომ უცნობი ადვოკატი მას სასამართლო პროცესზე ჩვენების შეცვლას აიძულებდა. მისი თქმით, ზეწოლა ხორციელდებოდა უვადო თავისუფლების აღკვეთის მუხლით ბრალდებული პირის — გიორგი პაპაშვილის სასარგებლოდ.
აღნიშნული წერილი ადვოკატის წინააღმდეგ საქმის შესაძლო აღძვრის საფუძველი გახდა. მოწმე დეტალურად აღწერს, როგორ ცდილობდა მასზე ზემოქმედებას ადვოკატი სასჯელაღსრულების დაწესებულებაში.
მოწმის წარმომადგენლის, ვერიკო კაპანაძის განცხადებით, სულეიმან ისამილოვი შესაძლოა დაქირავებული ყოფილიყო გიორგი პაპაშვილის ინტერესების დამცველი ადვოკატების მიერ. მისი თქმით, ფინანსური ანაზღაურების სანაცვლოდ იგი ციხეში შეიყვანეს და მოწმეებზე ზეწოლა დაავალეს.
საქმის მასალების მიხედვით, ზეწოლის მიზანი იყო, სასამართლოზე მოწმეებს ეთქვათ, რომ თაზო მთივლიშვილი გიორგი პაპაშვილის ცემის შედეგად არ გარდაცვლილა.
აღნიშნულ ვერსიას ნაწილობრივ ადასტურებს თავად გიორგი პაპაშვილის ადვოკატების საჯარო განცხადებებიც, სადაც ისინი საუბრობენ ბრალდების გადაკვალიფიცირების შესაძლებლობაზე — განსაკუთრებით მძიმე დანაშაულიდან უფრო მსუბუქ მუხლზე.