მზია ამაღლობელს მე გადავუხდი იურისტების ფულს და წავიდეს სტრასბურგში – ამის შესახებ “ტვ იმედის” ყოფილმა მფლობელმა, ირაკლი რუხაძემ “კაცმანის პოდკასტში” განაცხადა და იქვე დასძინა: “პოლიტიკური საქმეებით სტრასბურგში იმიტომ არ მიდიან, იციან წააგებენო”.
რუხაძემ ასევე ისაუბრა დამოუკიდებელ მედიებზე და თქვა, რომ როგორც კი საქართველოში მედიების დახურვას დაიწყებენ, “მეც გამოვალ და დავიცავ იმ ოპოზიციურ ტელევიზიებს, რომლებსაც დასანახად ვერ ვიტან”.
“ვიცი, ის [მედია] რომ დახუროს, მერე ჩემთვისაც ცუდი იქნება. ვიცი რა მოხდა, როცა სააკაშვილმა აქ ყველა ტელევიზია დახურა. რუსეთს არ აქვს თავისუფალი პრესა.
ჩვენ სტრასბურგიდან არ გამოვედით. სტრასბურგის ყველა გადაწყვეტილებას ვასრულებთ. სტრასბურგში აქამდე ოთხჯერ წავიდნენ და ყველა საქმე წააგეს პოლიტიკურ პატიმრებზე. თუ არსებობს პოლიტიკური პატიმარი სტრასბურგში წავიდეს. რატომ არ მიდიან? იმიტომ არ მიდიან რომ წააგებენ”.- თქვა რუხაძემ.
ცნობისთვის, სტრასბურგის სასამართლოშ მზია ამაღლობელის 3 სარჩელია რეგისტრირებული. ერთი სარჩელი ეხება პოლიციის განყოფილებაში მის მიმართ არასათანადო მოპყრობას, მეორე სარჩელი ეხება აღკვეთის ღონისძიების სახით პატიმრობის უკანონო გამოყენებას, ხოლო მე-3 სარჩელი მზიას ადმინისტრაციულ დაკავებასა და მასთან დაკავშირებულ დარღვევებს ეხება. მზადდება რიგით მე-3 სარჩელიც, რომელიც უშუალოდ სისიხლის სამართლის საქმეს მიემართება.