ჯანდაცვის მინისტრის გამოსვლის პარალელურად, პარლამენტთან დიუშენის კუნთოვანი დისტროფიით დაავადებული ბავშვების მშობლები აქციას მართავენ. პროტესტის მონაწილეები მიხეილ სარჯველაძეს ტყუილში ამხელენ და ამბობენ, რომ მედიკამენტის შესახებ მინისტრის განცხადებები სიმართლეს არ შეესაბამება.
მშობლები ამბობენ, რომ მინისტრს არ აქვს უფლება, მათი შვილების წლებით იმანიპულიროს.
“გამოვიდა სარჯველაძე და თქვა, რომ მშობლებს აქვთ ტყუილი მოლოდინი და ეს პრეპარატი მხოლოდ 3 წლით გადაავადებს ეტლში ჩაჯდომას. მე მინდა, რომ სამი დღე ჩაჯდეს ეტლში ამოუსვლელად და შეადაროს ის სამი წელი და სამი დღე როგორი იქნება მოლოდინი ეტლში ჩაჯდომისას. თვითონ ჩაჯდეს სამი დღე ეტლში, რომ მიხვდეს რამდენს გავდივართ და რამდენს ნიშნავს ეგ სამი წელი ჩვენთვის. რატომ არ შეგვიყვანეს პარლამენტში ერთი მშობელი მაინც, რომ ჩვენი აზრიც გაეგო და ჩვენგანაც მოესმინა ხალხს და საზოგადოებას” – ამბობს მშობელი.
“სამარცხვინოს” უწდებს მინისტრის განცხადებას პროტესტის კიდევ ერთი მონაწილე. მოქალაქის თქმით, ჯანდაცვის მინისტრს მედიკამენტში თანხის გადახდა არ უღირს.
“სამარცხვინოა, საშინელებაა ამის მოსმენა. როგორ ბედავსს და ამობს, რომ სამი წლით ავადებს წამალი ეტლს? ზუსტად იმიტომ გვინდა ეტლის გადავადება, რომ არ წავიდეს დაავადების პროგრესი. ეტლის შემდეგ იწყება გართულება და როგორ გვითვლის წლებს და როგორ ბედავს იმის თქმას, რომ სამი წლით ავადებს მხოლოდ ეტლში ჩაჯდომას? ჩვენი შვილებისთვის არ უღირს მაგ თანხის გადახდა სამი წლით გადავადებაში. ეს არის მაგის ნათქვამი. მარტო სამ წელზე არ არის, სამი დღეც რომ იყოს, ჩვენ მოვითხოვთ, რომ შემოიტანოს ეს წამალი და გადაუვადოს ბავშვებს სიცოცხლე” – ამბობს პროტესტის მონაწილე მოქალაქე.
მშობლები მიხეილ სარჯველაძეს მოუწოდებენ, ნუ გაჰყავს დრო პროპაგანდასა და დეზინფორმაციის გავრცელებაში.
“მივმართავ მინისტრს, ნუ გააქვს დრო პროპაგანდასა და დეზინფორმაციაში. ძალიან კარგად იცის რა წამლებს ვითხოვთ, რომლებიც უკვე აღიარებულია, რომელსაც ქართველი ბავშვებიც იღებენ საზღვარგარეთ. მე მყავს 13 წლის შვილი, უკვე ეტლში მჯდომი, ჩვენი შვილებისთვის ერთი წამიც დასაკარგი არ არის და ნუ გააქვს დრო. ორი წელი უკვე დააკარგვინა ამ ბავშვებს და ვითხოვთ წამალს” – ამბობს მოქალაქე.