უწყვეტი პროტესტის მეხუთე დღე მთავრობის ადმინისტრაციასთან – დიუშენის კუნთოვანი დისტროფიის მქონე ბავშვების მშობლები ამ დრომდე წამალს ითხოვენ.
იშვიათი დიაგნოზის მქონე ბავშვების მშობლები ამბობენ, რომ არ არის საკმარისი ის, რასაც ჯანდაცვის სამინისტრო მოზარდებს ჰპირდება.
მათი მთავარი მოთხოვნა ქვეყანაში იმ მედიკამენტის შემოტანაა, რომელიც მათი შვილების სიცოცხლისთვის მნიშვნელოვანია.
“ჩვენ ისევ გარეთ ვდგავართ, ვაგრძელებთ პროტესტს, ეს არის უწყევტი პროტესტი, მშობლები ერთმანეთს ვენაცვლებით, მაგრამ ჩვენთან არავინ ჩამოსულა, რომ ეთქვა ჩვენთვის, რაღაც ნაბიჯების გადადგმაზე. ერთადერთი მოვისმინეთ მინისტრის განცხადება, რომ მან დაიწყო ექიმების გუნდის შეკრება, მულტიდისციპლინური გუნდი, რომ ჩვენ შვილებს სჭირდებათ წელიწადში ორჯერ მონიტორინგი და ესეც ჩვენთვის ცოტა ბუნდოვანია, რადგან არ უთქვამს ზუსტად, როდის დაიწყებს ამ გუნდის შეკრებას და მუშაობას” – ამბობს ერთ-ერთი მშობელი.
დევნილთა, შრომის, ჯანმრთელობისა და სოციალური დაცვის სამინისტროს განცხადებით, სპინალურ კუნთოვანი ატროფიის, დიუშენისა და ბეკერის კუნთოვანი დისტროფიის მქონე პაციენტებისთვის სერვისების ფართო სპექტრი იქნება ხელმისაწვდომი.
კერძოდ, განცხადების მიხედვით, საუბარია ამბულატორიულ, სტაციონარულ და კვლევით მომსახურებებზე.
როგორც განცხადებაშია აღნიშნული, მომსახურებებს სახელმწიფო დააფინანსებს და პაციენტებისთვის სერვისები სრულად უფასო იქნება.