მეოთხე დილა მთავრობის ადმინისტრაციასთან – დიუშენის კუნთოვანი დისტროფიით დაავადებული ბავშვების დედები მოთხოვნების შესრულებას ელოდებიან.
ქუჩაში მყოფი მოქალაქეები ამ დრომდე ითხოვენ წამალს, რომელიც მათი შვილების სიცოცხლის გასახანგრძლივებლად, ჯერ-ჯერობით ერთადერთი საშუალებაა, თუმცა ჯანდაცვის სამინისტრო პაციენტებს ჯერ მხოლოდ სერვისების ფართო სპექტრს ჰპირდება – ამბულატორიულ, სტაციონარულ და კვლევით მომსახურებებას.
მშობლები ამბობენ, რომ მხოლოდ კვლევების შეთავაზება ბავშვებს ვერ გადაარჩენთ.
“ჩვენ ისევ ვაგრძელებთ ჩვენს მოთხოვნას, ვინაიდან მხოლოდ გამოკვლევები არ არის ჩვენი საშველი. ამ ბავშვებს სჭირდებათ კვლევები და მედიკამენტი. მარტო კვლევები ამ ბავშვებს ვერ გადაარჩენს”, – ამბობს კახა წიქარიშვილი.
“მეოთხე დღეა ჩვენ უკვე აქ ვდგავართ განწირული მშობლები, რომლებთანაც სიკვდილის მანქანაა მოსული ჩვენს ოჯახებში და ვთოვთ, რომ გადაგვარჩინეთ და რაღაც მიზეზებს ასახელებენ, რომ ვითომ არ არის აღიარებული “ემადა”, ვითომ ევროპაში არ არის ეს წამლები. აგერ იტალიაში გაიკეთა ქართველმა ბავშვმა, გერმანიაში გაიკეთა, იღებენ ამ მედიკამენტს, რომელიც არის აღიარებული, რა აღიარებას ითხოვენ კიდევ”, – ამბობს მშობელი.
დევნილთა, შრომის, ჯანმრთელობისა და სოციალური დაცვის სამინისტროს განცხადებით, სპინალურ კუნთოვანი ატროფიის, დიუშენისა და ბეკერის კუნთოვანი დისტროფიის მქონე პაციენტებისთვის სერვისების ფართო სპექტრი იქნება ხელმისაწვდომი.
კერძოდ, განცხადების მიხედვით, საუბარია ამბულატორიულ, სტაციონარულ და კვლევით მომსახურებებზე.
როგორც განცხადებაშია აღნიშნული, მომსახურებებს სახელმწიფო დააფინანსებს და პაციენტებისთვის სერვისები სრულად უფასო იქნება.