“ვიდეოს ვერ ვწერ – ლაპარაკის დროს ძალიან ვიღლები. მინდა მივმართო ჯანდაცვის სამინისტროს: არსებობს წამალი, რომელიც დაეხმარება და სიცოცხლეს გაუხანგრძლივებს პატარებს” – წერს სოციალურ ქსელშიდიუშენის კუნთოვანი დისტროფიის მქონე დიმა ვარდუაშვილი.
“მე დიმა ვარ ვარდუაშვილი. მეც დიუშენის პაციენტი ვარ. ვიდეოს ვერ ვწერ – ლაპარაკის დროს ძალიან ვიღლები. მინდა მივმართო ჯანდაცვის სამინისტროს: არსებობს წამალი, რომელიც დაეხმარება და სიცოცხლეს გაუხანგრძლივებს პატარებს. მე უკვე დიდი ვარ წამლისთვის, თუმცა ძალიან მინდა, ის გზა, რაც მე გავიარე დღემდე, ამ ბავშვებმაც არ გაიარონ. გთხოვთ, დაეხმაროთ – ჩვენ თუ ვერა, ისინი მაინც იყვნენ ლაღები, ბედნიერები და ჯანმრთელები. არა და, ჩვენ ხომ იმიტომ აგირჩიეთ, რომ გეზრუნათ ქვეყნის მოქალაქეებზე? ამ დროს კი, ბავშვებისთვის არ გემეტებათ ყურადღება. მე მინდა ისეთი ქვეყანა, სადაც ბავშვის მომავალი და ჯანმრთელობა პირველ ადგილზე იქნება. არ მინდა ქვეყანა, სადაც უწამლობის გამო იღუპებიან ბავშვები.” – წერს სოციალურ ქსელში დიუშენის კუნთოვანი დისტროფიის მქონე დიმა ვარდუაშვილი.
21 აპრილს ჯანდაცვის მინისტრმა სარჯველაძემ განაცხადა, რომ “დიუშენის განკურნებაზე პრეტენზიის მქონე მედიკამენტი დღეს მსოფლიოში არ არსებობს” და არსებობს მხოლოდ მედიკამენტები, რომელსაც აქვს პრეტენზია დაავადების მიმდინარეობის შენელებაზე. მისივე თქმით, დაფიქსირდა შემთხვევები, როდესაც მედიკამენტების გამოყენებას ფატალური შედეგი მოჰყვა. პარალელურად, დიუშენის კუნთოვანი დისტროფიის მქონე შვილების მშობლები უწყვეტ აქციებს მართავენ და ქვეყანაში წამლის შემოტანას ითხოვენ. მშობლებმა კანცელარიასთან მე-2 ღამე გაათენეს.