მორიგი ოპერაცია ნარკოდანაშაულის წინააღმდეგ. ამჯერად საუბარია ე.წ. ბიოს გასაღებაზე. “კურიერს” იმ სახლის კარი დაუხურეს, სადაც 997 შეკვრა, ე.წ. ბიოს ინახავდნენ. 39 წლის მამაკაცის ოჯახის წევრმა, ნარკოდანაშაულზე დასმული კითხვა უპასუხოდ დატოვა.
მეზობლებმა გაიხსნეს, რომ კორპუსთან სამართალდამცველების განსაკუთრებული მობილიზება იყო. დაინახეს ნაქირავები ბინიდან ხელბორკილებით გამოყვანილი 39 წლის მამაკაციც.
“კურიერის” ინფორმაციით, დაკავებული ნარკოდანაშაულებრივი ჯგუფის წევრი იყო, მას მოკავშირე ჰყავდა 26 წლის მამაკაციც, რომელიც ნასამართლევია.
დანაშაულებრივი ჯგუფის წევრების კვალზე პოლიცია კომპლექსური ღონისძიების ჩატარების შემდგე გავიდა. “კურიერის” ინფორმაციით, 39 და 26 წლის მამაკაცები სამართალდამცველებმა რუსთავში ტაშკენტის ქუჩაზე შეაჩერეს და გადაამოწმეს, 110 შეკვრა ბიო პოლიციამ მათი პირადი ჩხრეკისას და სამალავებიდან ამოიღო.
სამალავებად, ძირითადად, სადარბაზოებში დამონტაჟებულ მრიცხველებს იყენებდნენ. ნარკოტიკს დებდნენ, ფოტოს უღებდნენ და კლიენტს უგზავნიდნენ.
ახალგაზრდა მამაკაცები გლდანი-ნაძალადევის პოლიციის თანამშრომლებმა დააკავეს. საპოლიციო ღონისძიების შესახებ დღეს განცხადება, თბილისი პოლიციის დეპარტამენტის დირექტორმა გააკეთა.
სარეალიზაციოდ გამზადებული 1107 შეკვრა ე.წ. ბიო, ელექტრო სასწორები, წებოვანი ლენტები და პოლიეთინელის პარკები, ნივთმტკიცებები, სამართალდამცველებმა ბინის და პირადი ჩხრეკისას ამოიღეს.
საპოლიციო ღონისძიებები ნარკოდანაშაულის წინააღმდეგ ყოველდღიურად მიმდინარეობს. ნარკოდამნაშავეების დასადგენად სამართალდამცველები ოპერატიულ და კომპლექსურ ღონისძიებებს 24 საათის განმავლობაში ატარებენ.
1107 შეკვრა ე.წ. ბიოს საქმეზე საგამოძიებო მოქმედებები ამ დრომდე გრძელდება. 26 და 39 წლის მამაკაცებს ბრალად ედებათ განსაკუთრებით დიდი ოდენობით ნარკოტიკის შეძენა-შენახვა და რეალიზაციის ხელშეწყობა.