დიუშენის კუნთოვანი დისტროფიით დაავადებული ბავშვების მშობლები სახელმწიფოსგან კონკრეტულ გადაწყვეტილებას ელოდებიან — სასიცოცხლოდ აუცილებელი მედიკამენტების შესყიდვასა და ქვეყანაში შემოტანას. აღნიშნული მოთხოვნით ისინი ხვალიდან მთავრობის ადმინისტრაციასთან, ირაკლი კობახიძის სამუშაო ოფისის მიმდებარედ, 24-საათიან უწყვეტ პროტესტს იწყებენ.
მშობლების განცხადებით, ისინი დღე-ღამის განმავლობაში ადგილზე დარჩებიან მანამდე, სანამ ხელისუფლება მათი შვილებისთვის საჭირო პრეპარატის შეძენაზე გადაწყვეტილებას არ მიიღებს. მათი თქმით, დრო გადამწყვეტია, რადგან დაავადება პროგრესირებადია და თითოეული დღე ბავშვების ჯანმრთელობაზე პირდაპირ აისახება.
როგორც პროტესტის მონაწილეები განმარტავენ, აღნიშნული მედიკამენტი დაავადების განვითარებას ანელებს და მნიშვნელოვნად აუმჯობესებს პაციენტების სიცოცხლის ხარისხს. მის გარეშე, მათი შეფასებით, ასამდე არასრულწლოვნის ჯანმრთელობა სერიოზული საფრთხის წინაშე დგას.
დიუშენის კუნთოვანი დისტროფია იშვიათი გენეტიკური დაავადებაა, რომელიც თანდათან ზღუდავს მოძრაობის უნარს და დროთა განმავლობაში იწვევს კუნთების სუსტებასა და სრული პარალიზების განვითარებას.