125 ათასი ლარის თაღლითურად მითვისების საქმეზე 29 წლის სტილისტს 10 წლამდე პატიმრობა ემუქრება. ესმა კარაპეტიანი პოლიციამ განყოფილებაში, გამოკითხვაზე მისულს დააკავა. გამოძიების ვერსიით, ბრალდებული ხანდაზმულ მოქალაქეებს შეცდომაში შეჰყავდა და მათ საპენსიო დანაზოგებს თაღლითურად ეუფლებოდა.
გამოძიების ინფორმაციით, საქმე ეხება ორგანიზებულ დანაშაულებრივ სქემას, რომელშიც სხვადასხვა პროფესიის პირები იყვნენ ჩართულნი. ისინი ასაკოვან მოქალაქეებს ტელეფონით უკავშირდებოდნენ და თავს კომუნალური კომპანიების თანამშრომლებად ასაღებდნენ. პერსონალური მონაცემების მოპოვების შემდეგ, იმავე ჯგუფის წევრები დაზარალებულებს ხელახლა უკავშირდებოდნენ და ამჯერად სამართალდამცველებად წარდგებოდნენ, თითქოს მიმდინარეობდა გამოძიება. ამ გზით მათ მოქალაქეებს ართმევდნენ ნაღდ ფულს და ჰპირდებოდნენ, რომ თანხას გამოძიების დასრულების შემდეგ დაუბრუნებდნენ. გამოძიების ცნობით, თაღლითობის გზით მითვისებული თანხა 125 ათას ლარს შეადგენს.
პროკურატურამ საქმე გახსნილად გუშინ გამოაცხადა, თუმცა ამ ეტაპზე ბრალდებული ორი პირია. ესმა კარაპეტიანთან ერთად დაკავებულია 22 წლის უკრაინის მოქალაქე, ოლექსანდრ პავლიუკი. სასამართლო პროცესზე ორივე ბრალდებული აცხადებს, რომ მხოლოდ კურიერებად მუშაობდნენ და არ იცოდნენ, რა იყო გადაცემულ კონვერტებში.