სასახლის ღობის საქმეზე ბრალდება მტკიცებულებების გამოკვლევას ასრულებას – დღევანდელ პროცესზე პროკურატურის ბოლო მოწმე, მთავარი გამომძიებელი კონსტანტინე კერესელიძე გამოიკითხება.
მოსამართლე თამარ მახარობლიძემ სხდომა უკვე გახსნა. დღევანდელ პროცესს არ ესწრება ორი ბრალდებული: ავთანდილ გიუნაშვილი და ბექა მაჭავარიანი. როგორც მოსამართლემ განმარტა, ბრალდებულმა სხდომაზე დასწრებაზე უარი თავად თქვეს.
პროცესის პარალელურად, დაცვის მხარე გამოძიების პოზიციას ეჭვქვეშ აყენებს — ადვოკატი გურანდა ქურდოვანიძე აცხადებს, რომ საქმის მასალებში არსებულ წინააღმდეგობებს დღეს სასამართლოში კიდევ ერთხელ გაივლიან.
“დღეს გამოიკითხება საქმის მთავარი გამომძიებელი, მოხდება ვიდეომასალის გამოკვლევა სასამართლო პროცესზე, რის შეფასებასაც შემდეგ ჩვენ მოვახდენთ. წინა პროცესებმა დაგვანახა ძალიან ცხადად, რომ ის ყველა მოწმე, რომელიც ბრალდების მხარემ სასამართლო პროცესზე და მოხდა ჩვენი მხრიდან მათი დაკითხვა, თუკი იქნება დამოუკიდებელი, მიუკერძოებელი და სამართლიანი სასამართლო, მოსამართლე აუცილებალდ აღნიშნული ბრალდებულების მიმართ გამოიტანს გამამართლებელ განაჩენს.
ორი ურთიერთგამომრიცხავი პასუხი გასცა ჩვენმა პატივცემულმა გამომძიებელმა. რა თქმა უნდა, აღნიშნულ საკითხს კვლავ ჩავშლით დღეს დაცვის მხარე, კვლავ იქნება მთელი რიგი კითხვები და დაველოდებით მათგან მიღებულ პასუხს” – ამბობს ადვოკატი გურანდა ქურდოვანიძე.
ცნობისთვის, კახაბერ კვაჭანტირაძეს, სიმონ მახარაძეს, გია თოლორაიას, ავთანდილ თოფჩიშვილს, მიხეილ თოლორაიას, იური ლომიძეს, გიორგი ტალახაძეს, დავით გიუნაშვილს, საბა კორძაიას, გიორგი კირვალიძეს, კობა ეპიტაშვილს, მანუჩარ მიქელაძეს და ბექა მაჭავარიანს ბრალი წარდგენილი აქვთ საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით, რაც სტრატეგიული და განსაკუთრებული მნიშვნელობის ობიექტების ჯგუფურად ხელში ჩაგდების ან ბლოკირების მცდელობას გულისხმობს.
გარდა ამისა, მათ ასევე ედავებიან სსკ-ის 225-ე მუხლის მეორე ნაწილით გათვალისწინებულ დანაშაულს, რაც ჯგუფურ ძალადობაში მონაწილეობას მოიცავს.