დიუშენის კუნთოვანი დისტროფიით დაავადებული ბავშვების მშობლები ირაკლი კობახიძესთან შეხვედრას ითხოვენ. აქცია მთავრობის კანცელარიასთან დღეს 14:00 საათზეა ჩანიშნული.
ხალხი სახელმწიფოსგან ითხოვს მედიკამენტს, რაც იშვიათი დაავადების მქონე ბავშვებისთვის სასიცოცხლოდ მნიშვნელოვანია.
“საქართველოში რეგისტრირებულია დიუშენის კუნთოვანი დისტროფიით დაავადებული 100-მდე ბავშვი, რომლებსაც ესაჭიროებათ მედიკამენტები და ესაჭიროებათ პერიოდული შემოწმება. ამ ბავშვების სიცოცხლის გადარჩენა სახელმწიფოს უპირველესი ვალდებულებაა. ამიტომ დღეს 14:00 საათზე, ჩვენ მივალთ სახელმწიფო კანცელარიაში და მოვითხოვთ პასუხს ჩვენს განცხადებებზე. ჯერ-ჯერობით ირაკლი კობახიძე ისევ თავს არიდებს ჩვენთან შეხვედრას, მაგრამ ის მუდმივად ვერ დაიმალება. გვჭირდება საზოგადოების მხარდაჭერა”, – ამბობს კახა წიქარიშვილი.
დიუშენის კუნთოვანი დისტროფია გენეტიკური დაავადებაა, რომელიც ადრეულ ასაკში კუნთების დასუსტებას და ფატალურ შედეგს იწვევს. მშობლები ერთი წელია ქვეყანაში ამ დაავადების სამკურნალო პრეპარატის შემოტანას უშედეგოდ ითხოვენ.