სხდომათა დარბაზში სკანდალური განცხადება გაკეთდა — ე.წ. „სასახლის ღობის“ საქმეზე მთავარმა გამომძიებელმა კონსტანტინე კერესელიძემ დაადასტურა, რომ საქმეში სათვალთვალო კამერების ჩანაწერები არ ჩადეს. მისი თქმით, ეს გადაწყვეტილება თავად მიიღო. ამავე საქმეში არ მოიპოვება რეზიდენციის შიდა კამერების კადრებიც და, როგორც ირკვევა, შესაბამისი მასალის მოთხოვნით სახელმწიფო დაცვის სამსახურსაც არ მიმართეს.
გამომძიებლის განმარტებით, ყურადღება ძირითადად სოციალურ ქსელ „ტიკტოკიდან“ ამოღებული ვიდეომასალის ანალიზზე იყო გამახვილებული. ამასთან, კერესელიძემ თავდაპირველად განაცხადა, რომ მთავარი მტკიცებულება, სასახლის ღობე, დალუქული იყო, თუმცა მოგვიანებით აღნიშნა, რომ მისი დალუქვა მოცულობის გამო ვერ მოხერხდა. „შაბათის ეთერის“ ჟურნალისტური გამოძიებით კი დადგინდა, რომ აღნიშნული ღობე ცერემონიების სასახლის პარკინგზეა მოთავსებული და წითელი ხალიჩით არის დაფარული.
საქმეზე 12 ბრალდებულის მიმართ, პროკურატურას, ფაქტობრივად, მხოლოდ ვიდეომასალა აქვს. პროკურორის განცხადებით, დამატებითი მტკიცებულებების მოძიება საჭიროდ არ მიიჩნიეს, რადგან საქმეში 10 ტერაბაიტამდე ვიდეოფაილია წარმოდგენილი, სადაც, მათი თქმით, ჯგუფური ძალადობის ფაქტები ფიქსირდება.