პოლონეთში საქართველოს მოქალაქე 40 წლის ქალს 5 თვის ჩვილის მკვლელობის საქმეზე ბრალი წაუყენეს. ქვეყნის მთავარი პროკურატურის ინფორმაციით, ბრალდებულს 15 წლამდე თავისუფლების აღკვეთა ემუქრება.
საქმემ ფართო რეზონანსი გამოიწვია პოლონურ მედიაში — ადგილობრივი გამოცემები და ტელევიზიები აქტიურად ავრცელებენ ინფორმაციას მძიმე დანაშაულის შესახებ. გავრცელებული ცნობებით, ჩვილი კლინიკაში კრიტიკულ მდგომარეობაში შეიყვანეს — მას იმდენად მძიმე დაზიანებები ჰქონდა, რომ ექიმებმა მისი გადარჩენა ვერ შეძლეს.
მედიკოსების ინფორმაციით, ბავშვს აღენიშნებოდა როგორც ძველი მოტეხილობები, ასევე თავის არეში მიყენებული მძიმე ტრავმები. ექიმებმა დაასკვნეს, რომ ჩვილი, სავარაუდოდ, ხანგრძლივი ძალადობის მსხვერპლი იყო.
მიუხედავად ჩატარებული ოპერაციისა, 5 თვის ბავშვის მდგომარეობა უკიდურესად მძიმე აღმოჩნდა და მისი გადარჩენა ვერ მოხერხდა. პედიატრიულ ცენტრში მიიჩნევენ, რომ მიღებული დაზიანებები არ შეესაბამება უბედურ შემთხვევას და მიუთითებს სისტემატურ ძალადობაზე.
საქმეზე დაკავებულია კიდევ ორი პირი — მოლდოვის მოქალაქე მამაკაცები. გამოძიების ვერსიით, ისინი ბავშვის მამასთან ერთად ცხოვრობდნენ და ბოლო პერიოდში ჩვილზე ზრუნვაშიც მონაწილეობდნენ.
საქართველოს მოქალაქე ქალმა სამართალდამცველებს განუცხადა, რომ შემთხვევის დროს მოლდოვაში იმყოფებოდა სტომატოლოგიური მკურნალობის მიზნით და არ იცის, ვინ მიაყენა ბავშვს დაზიანებები. მისი თქმით, ჩვილი კლინიკაში მას შემდეგ გადაიყვანეს, რაც სახლში დაბრუნდა და ბავშვის მძიმე მდგომარეობა აღმოაჩინა.