სასამართლო პროცესზე გაირკვა, რომ 4 ოქტომბრის მოვლენების დროს, საპრეზიდენტო სასახლის მიმდებარედ, სათვალთვალო კამერების ნაწილი დაფარული ან დაზიანებული იყო.
დღევანდელ სხდომაზე მოწმის ჩვენებით ცნობილი გახდა, რომ კამერებს მხოლოდ მიმართულება არ ჰქონდათ შეცვლილი — ზოგიერთ მათგანზე ე.წ. სკოჩი იყო გადაკრული, ნაწილზე კი საღებავი იყო შესხმული. მრავალწლიანი გამოცდილების მქონე პოლიციელმა განაცხადა, რომ რეზიდენციის მიმდებარედ განთავსებული კამერები, რომლებიც სრულ სურათს უნდა აფიქსირებდეს, უცნობმა პირებმა განზრახ დააფარეს.
ამ დრომდე გამოძიებას პასუხი არ გაუცია კითხვაზე — ვის ინტერესში შედიოდა, რომ 4 ოქტომბრის მოვლენების დროს კამერების ჩანაწერები არ არსებობდეს. ასევე უცნობია, ვინ დგას იმ ფაქტის უკან, რომ სამართალდამცავი ორგანოების კუთვნილი კამერები, სხვადასხვა მეთოდით, ფაქტობრივად გაუმოქმედებელი გახდა.
მოწმის ჩვენების შემდეგ დაცვის მხარე აცხადებს, რომ კამერების დაზიანება შესაძლოა მიზანმიმართული ყოფილიყო, რათა კონკრეტული ქმედებები ჩანაწერებში არ დაფიქსირებულიყო. ადვოკატების შეფასებით, კამერების სრულფასოვანი მუშაობის შემთხვევაში შესაძლებელი იქნებოდა იმ დღის მოვლენების უფრო დეტალურად აღდგენა.
საქმეზე განხილვა გრძელდება, თუმცა კამერების დაზიანების გარემოებები კვლავ ერთ-ერთ მთავარ საკითხად რჩება.