ოზურგეთში, დაბა ნასაკირალის მოსახლეობა წყლის პრობლემაზე საუბრობს – ხალხი ამბობს, რომ 15 წელზე მეტია წყალს ვედროებით ჭიდან ეზიდებიან.
ადგილობრივების თქმით, 18 ოჯახი ერთი ჭით სარგებლობს და სწორედ იქიდან მოაქვთ დასაბანი და სარეცხისთვის საჭირო წყალიც.
სარეცხი მანქანები ვიყიდეთ და გვიდგას ისე, ვერც ვიყენებთ, მოდიან-მიდიან და არაფერს აკეთებენ – ამბობენ ადგილობრივები.
“წვალებით ვცხოვრობთ, ამ ხნის ქალი ვედროებით დადის ერთი ჭა არის და ისიც ზაფხულში შრება. 18 ოჯახს ერთი ჭა როგორ ეყოფა და ისიც აქედან 300 მეტროში ათრიე. 21-ე საუკუნეა, ტუალეტ-აბანოს წყალი ხომ უნდა… რა არის, რა ქვეყანა არის, წყალს მიაქვს საქართველო.”
“სამი წელია ასე დადგმულია სარეცხი მანქანა და წლის უქონლობის გამო ვერ ვხმარობთ, ფეჩზე ვაცხელებსთ წყალს და ისევ ვრეცხავთ, ვწვალობთ.”
“15 წელია აქ ვარ და წყალი მე აქ არ დამინახია. ყოველთვის მოდიან-მიდიან, მარტო ლაპარაკი რჩება, მეტი არაფერი რჩება.”
ადგილობრივი ოპოზიციის თქმით, წყლის პრობლემის მოსაგვარებლად ბიუჯეტიდან 2 მილიონ ლარზე მეტი გამოიყო, თუმცა დაბა ნასაკირალს წყალი ამ დრომდე არ მიეწოდება.
“ბოლო წლებში აღნიშნულ პროექტთან დაკავშირებით 2 მილიონ ლარზე მეტი დაიხარჯა და მოსახლეობის ერთ ნაწილს წყალი ამ დრომდე არ მიეწოდება. მოვუწოდებ ოზურგეთის მერს, ბატონ კუნჭულიას, აღნიშნულ პროექტთან დაკავშირებით პირადად სარეზერვო ფონდიდან, რომელიც სულ მცირე 5000 ლარი დაუჯდება, რომ აღნიშნულ რაიონს წყლის სისტემა მიეწოდებოდეს, გადადგას ქმედითი ნაბიჯები”, – ამბობს ენმ-ს წევრი ბესო ქათამაძე.
“21-ე საუკუნეში ადამიანები ითხოვენ სასმელ წყალს, სარეცხისთვის და საბანაოდ გამოსაყენებელ წყალს. ამ დროს ოზურგეთის მერი დაკავებულია პირადი კომფორტის მოწყობით, კაბინეტის გარემონტებით, ჭურჭულების და ფარდების გამოცვლით”, – აცხადებს თათია ნიკოლაშვილი.