მარნეულის მერის ძმა, ქენან ისმაილოვი, რომელიც ბოლნისში ბიზნესმენის ჯგუფურ ცემაშია ბრალდებული, ბრალის წარდგენის მოლოდინშია – “ტვ პირველის” ინფორმაციით, ის ახლა წინასწარი დაკავების იზოლატორში გამომძიებლების შესვლას ელოდება.
პარალელურად, “ტვ პირველის” ინფორმაციით, ნაცემი ბიზნესმენის ჯანმრთელობის მდგომარეობა მძიმეა. არსებული ცნობებით, დაშავებული იმდენად მძიმე მდგომარეობაშია, რომ ამ ეტაპზე გამოძიებისთვის ჩვენების მიცემაც არ შეუძლია.
აღსანიშნავია, რომ სისხლიანი ანგარიშსწორება დილის 6 საათზე პოლიციის შენობიდან რამდენიმე მეტრში მოხდა. როგორც “ტვ პირველმა” გაარკვია, აღნიშნულ ტერიტორიაზე სათვალთვალო კამერები არ არის.
ადგილობრივების ინფორმაციით, მარნეულის მერის ძმამ, ქემალ ისმაილოვმა და კიდევ რამდენიმე პირმა პურის ბიზნესის მქონე მეწარმე „საქმის გასარჩევად“ დაიბარეს და მასზე ფიზიკურად სასტიკად იძალადეს. გავრცელებული ცნობებით, თავდასხმაში სულ 5 პირი მონაწილეობდა, რომელთაც ნიღბები ეკეთათ.
არსებული ინფორმაციით, ნაცემი მეწარმე თავად მივიდა მარნეულის პოლიციაში, მძიმე მდგომარეობაში.
შინაგან საქმეთა სამინისტრომ საქმე სისხლის სამართლის კოდექსის 126-ე მუხლით აღძრა (ძალადობა), რაც 6 წლამდე პატიმრობას ითვალისწინებს. ამ დროისთვის დაკავებულია მხოლოდ ქემალ ისმაილოვი.
მომხდარის მოტივად, არსებული ინფორმაციით, ბიზნესთან დაკავშირებული დაპირისპირება სახელდება.