როგორც ჩანს, ნოღაიდელი მობრძანდება დასაკითხად. აუცილებლად დავრჩები მისი დაკითხვის პროცესზე, – ამის შესახებ საქართველოს მესამე პრეზიდენტმა მიხეილ სააკაშვილმა საკუთარ სასამართლო პროცესზე განაცხადა, სადაც მოწმის სახით მისი პრეზიდენტობის დროინდელი პრემიერ-მინისტრი, ზურაბ ნოღაიდელი უნდა დაიკითხოს.
ამ წუთებში სააკაშვილი მის მხარდამჭერებსა და საზოგადოებას მიმართავს.
„მინდა გითხრათ, კარგი ამბები გვაქვს, რუსეთი მძიმე კრიზისშია… რაც შეეხება სომხეთს, რუსეთი მასაც კარგავს. ძალიან სასაცილო საყურებელი იყო პუტინის და ფაშინიანის შეხვედრა, პუტინი როგორ „აკაჩავებდა”, რომ მისი სამხედრო ბლოკებიდან არ გასულიყო და ევროკავშირს არ შეერთებოდა. რუსეთს ცუდად აქვს საქმე, რადგან ფრონტზე ძალიან კარგად მიდის საქმე. საერთო ტენდენცია სწორია და სწორი მიმართულებებით მიდის.
5-ჯერ ავაცილე საქართველოს დიდი უბედურება“, – განაცხადა სააკაშვილმა.
ცნობისთვის, სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.
საქართველოს ყოფილ პრეზიდენტს ბრალი საქართველოს სისხლის სამართლის კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია. აღნიშნული ბრალი სასჯელის სახედ და ზომად 5-დან 8 წლამდე ვადით თავისუფლების აღკვეთას ითვალისწინებს.
აღნიშნულ საქმეში სააკაშვილთან ერთად ბრალდებულები არიან ვანო მერაბიშვილი, ზურაბ ადეიშვილი, დავით კეზერაშვილი და გიგი უგულავა.