“ოცნების” დამაიმედებელ განცხადებებს, რომ აშშ-თან ურთიერთობები გადაიტვირთება, ოპოზიცია სკეპტიკურად უყურებს. ოპოზიცია ამბობს, რომ „გადატვირთვა“ კონკრეტული პოლიტიკური ნაბიჯების გარეშე ვერ მოხდება — „ლელოს“ ლიდერი გრიგოლ გეგელია მიიჩნევს, რომ ვაშინგტონი მკაფიო პირობებს დააყენებს.
“ჩვენ ვიცით, რომ “ქართული ოცნების” რეჟიმს სურს აშშ-თან გარკვეული სტაბილიზაციის მიღწევა, მაგრამ მათ არ სურთ, გაიაზრონ, რომ ამ სტაბილიზაციას აქვს ძალიან კონკრეტული პოლიტიკური ფასი. ეს ფასი ან იქნება შესრულებული და კონკრეტული ნაბიჯები იქნება გადადგმული, ან არანაირი სტაბილიზაცია არ იქნება. ამ ვიზიტიების მიზანი, ჯამში, არის, გამოარკვიოს ადგილზე სიტუაცია, გამოარკვიოს თუ რა შეიძლება, იყოს პოლიტიკური გადატვირთის ადეკვატური საწინდარი და როგორ შეიძლება იმ ძალიან მძიმე კრიზისი დაძლევა, რომელიც დღეს არის საქართველოში” – ამბობს გრიგოლ გეგელია.
კიდევ უფრო სკეპტიკურია „ნაციონალური მოძრაობის“ წარმომადგენელი პეტრე ცისკარიშვილი, რომელიც აცხადებს, რომ სტრატეგიული გადატვირთვა “ოცნების” ხელისუფლების პირობებში გამორიცხულია.
“ტაქტიკურ დონეზე, რაღაც მოლაპარაკებები დე ფაქტო მმართველებთან, რომლებიც ირანის სამეზობლოში აკონტროლებენ კონკრეტულ ქვეყანას, შეიძლება, მოუწიოს საუბარი აშშ-ს, ოღონდ, სტრატეგიული გადატვირთვა გამორიცხულია იმ ადამიანებთან, ვინც ცდენილია როგორც ღირებულებით ნაწილში, ასევე გეოპოლიტიკური ვექტორების თვალსაზრისით. მაინც, ამ ფოზე, კოლექტიური ქოცი მუდმივად ცდილობდა ურთიერთობის გადატვირთვას, დალაგებას იმ თვალსაზრისით, რომ მოდი, ვაღიაროთ, ბიძინა ივანიშვილს რომ სანქციები მოეხსნას” – ამბობს პეტრე ცისკარიშვილი.
ლევან მახაშვილის განცხადებით, აპრილში ამერიკის შეერთებული შტატებიდან საქართველოში ჩამოვა ჯგუფი, რომელიც საქართველოში მიმდინარე პროცესებს შეისწავლის.