ბელგიისა და ჰოლანდიის ეპისკოპოსმა, მეუფე დოსითეოსმა “TV პირველის” ეთერში თეა ადეიშვილთან ინტერვიუს დროს ეკლესიის საქმეებში ჩარევაზე ისაუბრა.
მისი თქმით, ჩამოყალიბდა ასეთი ხედვა, რომ ყოველთვის სახელმწიფო ცდილობდა, ეკლესიასთან ურთიერთობა ისეთი ჰქონოდა, რომ ის მართული ყოფილიყო”.
მეუფე დოსითეოსმა აღნიშნა, რომ ეს საუკუნეების პრობლემაა, რომელიც საქართველოში რუსეთის შემოსვლის შემდეგ განსაკუთრებით დიდი პრობლემა გახდა.
მანვე განაცხადა, რომ შესაძლოა საზოგადოების რაღაც წრეს სურვილი ჰქონდეს პატრიარქობის კანდიდატებს შორის თავისი “ფავორიტი” ჰყავდეს – “მთავარია ჩვენ არ მივაქციოთ ყურადღება, არ მოვექცეთ გავლენების ქვეშ”.
“ჩამოყალიბდა ასეთი ხედვა, რომ ყოველთვის სახელმწიფო ცდილობდა, ეკლესიასთან ურთიერთობა ისეთი ჰქონოდა, რომ ის მართული ყოფილიყო გარკვეული დოზით, ზოგჯერ შეიძლება მეტად, ნაკლებად, მაგრამ ეს მარტო დღევანდელი დღის პრობლემა არ გახლავთ, ეს გახლავთ ძალიან დიდი პრობლემა საუკუნეების მანძილზე და განსაკუთრებით, როცა რუსეთი შემოვიდა საქართველოში, იმის მერე ხომ საერთოდ. მე ვფიქრობ, რომ შეიძლება სხვა რამეც გაჟღერდეს, ირიბად იყოს ასეთი გაჟღერება მოხდეს, გაშუქება თუნდაც, ან ერთგვარი ზეგავლენის მოხდენა, ეს შესაძლებელია, ამას არ გამოვრიცხავ. ერთი ფაქტი არსებობდა, რატო სჭირდებოდა ეს განსახილველად, როგორ უნდა წაადგეს ეს საქართველოს ეკლესიას, არანაირად, ასეთი განცხადება. ამ დროს მაგალითად შეიძლება რუსეთს თავისი ინტერესები ჰქონდეს, მაგრამ ჩვენშიდაც, როდესაც ისეთი განცხადებები კეთდება, რომელიც შეიძლება ართულებდეს სიტუაციას, უფრო მძიმედ წარმოაჩენდეს, ესეც არ უწყობს ხელს, ამიტომ მარტო რუსეთი არ არის.
არა, დასავლეთი არ მიფიქრია სიმართლე გითხრათ, უბრალოდ გავლენის სფერო შეიძლება ბევრნაირი იყოს, მაგალითად საზოგადოების რაღაც წრეს სურვილი ჰქონდეს, თავისი ფავორიტი ჰყავდეს, დავუშვათ რაღაცნაირად უჭერდეს მხარს, მედიაში ეს გააჟღეროს და გაუსწროს მოვლენებს და ამ მოვლენების გასწრება სახეზე შეიძლება ასეთი მოვლენები ყოფილიყო. ამას ჩვენ დიდსულოვნად უნდა შევხედოთ იმიტომ, რომ პროცესი არის რთული, მოლოდინები მარტივი არ არის. მთავარია ჩვენ არ მივაქციოთ ყურადღება, არ მოვექცეთ გავლენების ქვეშ,” – განაცხადა მეუფე დოსითეოსმა.