თელავის მუნიციპალიტეტის სოფელ ყარაჯალაში ქალის დაყაჩაღების საქმეში ერთ-ერთი ბრალდებული, არასრულწლოვანია.
არასრულწლოვანი ახალგაზრდა ამავე ფაქტზე ბრალდებული პირის შვილია, ხოლო ბრალდებული ქალები ერთმანეთის დეიდაშვილები არიან.
საქმეში არასრულწლოვანის მონაწილეობის გამო, ბრალდებულებისათვის აღკვეთის ღონისძიების გამოყენების თაობაზე, დღეს თელავის რაიონულ სასამართლოში, დახურულ სხდომაზე იმსჯელეს.
დაცვის მხარემ სასამართლოს თითოეული ბრალდებულისათვის 5000-ლარიანი გირაოს შეფარდების შუამდგომლობით მიმართა.
მოსამართლემ დაცვის მხარის შუამდგომლობა არ გაითვალისწინა და სამივე ბრალდებულისათვის პატიმრობის გამოყენების შესახებ, პროკურატურის მოთხოვნა დააკმაყოფილა.
ამ ეტაპზე, ბრალდებულები, რომელთაგან ერთი, წარსულში ნასამართლევია, დუმილის უფლებას იყენებენ.
ყაჩაღობა ყარაჯალაში ორი დღის წინ მოხდა.
გამოძიების მტკიცებით, ბრალდებულები 71 წლის ქალს საცხოვრებელ სახლში, ნიღბებაფარებულები შეუცვივდნენ, ფიზიკურად გაუსწორდნენ, ძალის გამოყენებით გასტაცეს თანხა და მობილური ტელეფონი.
საქმეზე წინასასამართლო სხდომა 30 აპრილს ჩაინიშნა.
გამოძიება სისხლის სამართლის კოდექსის 179- ე მუხლით მიმდინარეობს. დანაშაული 9-დან 12 წლამდე ვადით თავისუფლების აღკვეთას ითვალისწინებს.