საპატრიარქოში რუსეთის დაზვერვის განცხადებაზე პირველი კომენტარი გაკეთდა – როგორც “რადიო თავისუფლებასთან” საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე ამტკიცებს, საპატრიარქოსთვის პატრიარქის არჩევნებში სხვა ადგილობრივი ეკლესიის მხრიდან ჩარევა “წარმოუდგენელია”.
„მსგავსი ჩარევა სხვა ადგილობრივი ეკლესიის მხრიდან ჩვენთვის წარმოუდგენელია, მიგვაჩნია ეს სრულიად შეუძლებლად. უცნობია ასეთი ინფორმაციის საფუძველი“, – მისწერა რადიო თავისუფლებას დეკანოზმა ანდრია ჯაღმაიძემ.
ცნობისთვის, საქართველოს კათოლიკოს-პატრიარქის არჩევასთან დაკავშირებით რუსეთის ფედერაციის საგარეო დაზვერვის სამსახურმა (СВР) განცხადება გაავრცელა.
რუსეთის საგარეო დაზვერვა მსოფლიო პატრიარქს საქართველოს მართლმადიდებელი ეკლესიის შიდა საქმეებში ჩარევაში ადანაშაულებს.
СВР ირწმუნება, რომ მსოფლიო პატრიარქი ბართლომეოსი საქართველოს პატრიარქობის კანდიდატებად მიტროპოლიტებს – აბრაამ გარმელიასა და გრიგოლ ბერბიჭაშვილს ლობირებს.