“ტერორიზმის საქმე ვერ შეკერეს და შარშან მომხდარ ხანძარს ელისაშვილს ედავებიან” – ამის შესახებ ოპოზიციონერი პოლიტიკოსის, ალეკო ელისაშვილის ადვოკატები, არჩილ ჩოფიკაშვილი და გიორგი რეხვიაშვილი განცხადებას ავრცელებენ.
უფლებადამცველები დაკავებული პოლიტიკოსის მიმართ პროკურატურის მიერ წაყენებულ ახალ ბრალს “ტერორისტული აქტის ჩადენის მეორე ეპიზოდზე”, ეხმაურებიან.
ადვოკატების განცხადებით, საგამოძიებო უწყების მიერ ახალი ბრალდების წარდგენა “ალეკო ელისაშვილის დამნაშავედ წარმოჩენის უსუსური და აბსურდული მცდელობაა”.
სუსის ისევ კომიკურ მდგომარეობაშია! ტერორიზმის საქმე ვერ შეკერეს და სასამართლოში შარშან მომხდარ ხანძარს, რომლის შესახებაც ამ დრომდე არავის არაფერი სმენია, ალეკო ელისაშვილს ედავებიან.
მნიშვნელოვანია, რომ ერთი წლის თავზე ტერორიზმად იქცა სასამართლოში გაჩენილი ხანძარი და მის უკანაც პოლიტიკოსის კვალი დადგინდა, მაშინ როდესაც თითქმის ერთი წლის განმავლობაში გამოძიება ქმედებას სხვისი ნივთის დაზიანებად აკვალიფიცირებდა.
პროკურატურის მიერ, დღეს გასაჯაროებული ეგრედ წოდებული მტკიცებულებები, (კადრები) ვერც ერთ შემთხვევაში ვერ ადასტურებს ამ ფაქტთან ალეკო ელისაშვილის შემხებლობას და კავშირს. კომიკურია ისიც, რომ თავად პროკურატურის მიერ ჩატარებული ექსპერიზის დასკვნითვე (26.02.2026) აღნიშნული კადრები ადამიანის იდენტიფიკაციისთვის უვარგისია.
სინამდვილეში ეს არის გაგრძელება იმ კამპანიის, რომლის მიზანიცაა ოპოზიციონერი პოლიტიკოსის დისკრედიტაცია და საზოგადოების თვალში მისი სისხლის სამართლის დამნაშავეთ წარმოჩენა.
ალეკო ელისაშვილის დემონიზაციის მიზანი, ამასთანავე არის მისი , როგორც პოლიტიკოსის განეიტრალება, სახელმწიფო უსაფრთხოების სამსახურის შეფის შურისძიება და რუსული განაჩენის დეფაქტო აღსრულება.
მიმდინარე საქმეში არ არსებობს რეალური დასაბუთება, რომელიც დაადასტურებდა ალეკო ელისაშვილის ტერორისტობას, შესაბამისად ხელისუფლებას ახალი საქმის შეკერვა დასჭირდა ბრალის დამაჯერებლობის გაზრდისთვის.
კომიკურია ისიც, რომ მთავარი მტკიცებულება პარასკევს ციხეში ჩატარებული ოდოროლოგიური (სუნის) ექსპერტიზაა, რომელიც არ წარმოადგენს უტყუარ მტკიცებულებას, ვინაიდან ტარდება ძაღლის მეშვეობით, რომელმაც ამ შემთხვევაში ერთი წლის წინ აღებულ სუნის ნიმუშზე იმუშავა და არ არსებობს მისი ზუსტი მეცნიერული მეთოდოლოგია და დასაბუთება,” – აცხადებენ უფლებადამცველები.