საქართველოში მომდევნო ორ თვეში საქონლის ხორცის ფასის მინიმუმ 20-25%-იანი ზრდაა მოსალოდნელი – ინფორმაციას BM. ge ავრცელებს და წერს, რომ მათთან ინტერვიუში ფერმერმა გურამ ბიჭიაშვილმა განაცხადა, რომ ხორცის ფასის მატება პირდაპირ კავშირშია რუსეთიდან ცოცხალი პირუტყვის იმპორტის შეჩერებასთან, რაც თავის მხრივ მეზობელ ქვეყანაში დაავადებების გავრცელებითაა გამოწვეული.
გამოცემა საქსტატის მონაცემებზე დაყრდნობით წერს, რომ წელს საქართველოში რუსეთიდან 565.1 ათასი აშშ დოლარის 178.2 ტონა ცოცხალი მსხვილფეხა რქოსანი პირუტყვი შემოვიდა, თუმცა თებერვალში იმპორტი მკვეთრად – 80%-ით არის შემცირებული. მარტის მონაცემები კი ხელმისაწვდომი 19 აპრილს იქნება.
“ორ თვეზე მეტია, რუსეთიდან ერთი სული პირუტყვიც არ შემოსულა საქართველოში. უკრაინიდან ისედაც არ შემოდიოდა და ძალიან იშვიათად, გემით თუ შემოიყვანდი, რადგან ლოგისტიკურად ფაქტობრივად გამორიცხული იყო მისი შემოყვანა. შესაბამისად, უახლოეს ერთ-ორ თვეში მინიმუმ 20–25%-იანი ფასის ზრდაა მოსალოდნელი – ვამბობ მინიმუმს. აღდგომის შემდეგ ეს ყველაფერი ძალიან სწრაფად გახდება შესამჩნევი და ფასში ყოველდღიური ცვლილება იქნება. ჩვენ უბრალოდ კულუარული წყაროებით ვიცით, რომ რუსეთში პასტეურელოზია გავრცელებული. ეს იქნება მიზეზი, რაც ფასებს გაზრდის. სავარაუდოდ, დეფიციტიც შეიქმნება ადგილობრივ ბაზარზე” – განუცხადა გამოცემას ფერმერმა გურამ ბიჭიაშვილმა.