“ჩვენი გეგმაა, რუსთაველის გამზირის რეაბილიტაცია მაისში დავიწყოთ” – გიორგი ტყემალაძე

ჩვენი გეგმაა, რუსთაველის გამზირის რეაბილიტაცია მაისში დავიწყოთ – ამბობს თბილისის ვიცე-მერი გიორგი ტყემალაძე გამოცემა BM. ge-სთან საუბრისას. გუშინ ცნობილი გახდა, რომ ჩაიშალა 12.3 მილიონი ლარის ღირებულების ტენდერები რუსთაველის გამზირის რეაბილიტაციაზე, რომლებიც თბილისის მერიამ 20 თებერვალს გამოაცხადა. სახელმწიფო შესყიდვების ეროვნული სააგენტოს ვებგვერდის თანახმად, ამ ტენდერებში წინადადებები არცერთმა კომპანიამ არ წარადგინა

“ეს ბუნებრივი პროცესია, ხშირ შემთხვევაში შეიძლება გარკვეული პროექტი ჩავარდეს, თუმცა უახლოეს დღეებში ახალი ტენდერები დაიდება. ჩვენი გეგმაა, რომ მაისის შუა რიცხვებში სამუშაოები დაიწყოს, რათა მაქსიმალურად გამოვიყენოთ ზაფხულის პერიოდი და სექტემბერ-ოქტომბრისთვის, როცა ახალი სასწავლო წელი დაიწყება, ეს სამუშაოები უკვე დასრულებული იყოს. ამიტომ, უახლოეს დღეებში გამოცხადდება ახალი ტენდერი და ის აუცილებლად ჩატარდება” – ამბობს ტყემალაძე.