ე.წ. „კანონიერი ქურდის“, ჯვარსკის დედა, მანანა უბილავა, სასამართლომ პატიმრობაში დატოვა. ბრალდებულმა დღევანდელ პროცესზე დუმილი არ დაარღვია.
უბილავას 10 წლამდე თავისუფლების აღკვეთა ემუქრება. პროკურატურის მტკიცებით, ის საკუთარი შვილის, ე.წ. „კანონიერი ქურდის“ დავალებით, ქურდულ გარჩევებში მონაწილეობდა. დაცვის მხარემ სასამართლოს შესთავაზა, რომ ბრალდებულის შვილი თავდებში ჩადგებოდა დედის გათავისუფლების სანაცვლოდ, თუმცა მოსამართლემ შუამდგომლობა არ დააკმაყოფილა.
საქმე უკვე გადაცემულია არსებით განხილვაზე და ბრალდება მტკიცებულებების გამოკვლევას აპრილიდან დაიწყებს. მომდევნო პროცესებზე, პროკურატურის ვერსიით, უნდა გამოიკვეთოს, როგორ ამყარებდა ბრალდებული კავშირს კრიმინალურ სამყაროსთან, მათ შორის სოციალური ქსელების მეშვეობით და როგორ გასცემდა ე.წ. „პრაგონის“ მითითებებს.
დღევანდელ სხდომაზე ბრალდებულებმა დუმილი შეინარჩუნეს და დანაშაული არცერთმა მათგანმა არ აღიარა. ადვოკატებმა კი ეჭვქვეშ დააყენეს საქმეში ჩართული თარჯიმნის კვალიფიკაცია, რომელიც პროკურატურამ დასაკითხ პირთა სიაში არ შეიყვანა.