კბილის ტკივილი ერთ-ერთი ყველაზე აუტანელი და შემაწუხებელი რამაა, რომელსაც ხშირ შემთხვევაში მხოლოდ სტომატოლოგთან ვიზიტი თუ შველის. ამ პრობლემასთან საბრძოლველად უამრავი რამ გამოიგონეს მათ შორის ხელოვნური მინანქარი, რომელიც ბუნებრივზე უფრო ძლიერია.
ცხოვრების უფრო მეტად გასამარტივებლად მეცნიერებმა ნანობოტების არმია შექმნეს,, რომლებიც კბილებში არსებულ ბაქტერიებს ებრძვიან. ისინი რთულად მისადგომ ადგილებში მარტივად ხვდებიან და ბაქტერიებს გამოყოფილი სიცხის მეშვეობით კლავენ. მეცნიერების მიერ გამოქვეყნებული ოფიციალური გამოცემის თანახმად სპირალური ფორმის მასალა დამზადებულია რკინით დაფარული სილიციუმის დიოქსიდისგან, რომლის კონტროლი შესაძლებელია დაბალი ინტენსივობის მაგნიტური ველის წარმოქმნის მოწყობილობით.
დღესდღეობით არსებული ტექნოლოგია ასე ღრმად ჩასვლის საშუალებას არ იძლევა, ლაზერებისა და ულტრაბგერითი მოწყობილობების ლიმიტი დაახლოებით 800 მიკრომეტრია, ასე კი მიკრობები სრულად ვერ ნადგურდება. ნაკლებად ეფექტიანია ანტიბიოტიკებიც, რადგან ზოგიერთი სახეობა, მაგალითად Enterococcus faecalis, ამგვარი პრეპარატების მიმართ რეზისტენტულია.
ამ მხრივ ნანობოტები კარგი გამოსავალია. პროცედურის დასრულების შემდგომ, მათ კბილის არხებიდან ისევ მაგნიტური ველის დახმარებით ამოიყვანენ. აღსანიშნავია, რომ ისინი თაგვის მოდელზე უკვე გამოცადეს, რამაც დადებითი შედეგი აჩვენა.