პატრიარქთან გამოსამშვიდობებლად სამების ტაძარში ცესკოს თავმჯდომარე მივიდა. გიორგი კალანდარიშვილი ილია მეორესთან შეხვედრას იხსენებს და ამბობს, რომ მაშინდელი განცდა მთელი ცხოვრება ემახსოვრება.
“სამების ტაძარში მოსულს შემთხვევით დიდი სითბოთი და რუდუნებით თავზე ხელი დამადო. ეს იყო განცდა, რომელიც წარუშლელი იქნება ალბათ მთელი ცხოვრების მანძილზე. ჩემი შვილის ნათლია გახლავთ უწმინდესი და რა თქმა უნდა, ორმაგად და სამმაგად მნიშვნელოვანია ჩემთვის. მოვედი ოჯახთან ერთად, რათა პატივი მივაგო მის ხსოვნას და ამ ბოლო ჟამს დავემშვიდობოთ მას”, – ამბობს კალანდარიშვილი.
უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი, 2026 წლის 17 მარტს, გვიან საღამოს, 93 წლის ასაკში გარდაიცვალა. ინფორმაცია ილია მეორეს გარდაცვალების შესახებ 22:47 საათზე კლინიკასთან დაადასტურა საპატრიარქო ტახტის მოსაყდრემ, მიტროპოლიტმა შიო მუჯირმა.
მეორე დღეა, სრულიად საქართველოს კათოლიკოს-პატრიარქ ილიასთვის პატივის მისაგებად სამების საპატრიარქო ტაძარში სამოქალაქო პანაშვიდი გრძელდება. ილია II ყოვლადწმინდა სამების სახელობის საკათედრო ტაძარში გუშინ დაასვენეს.
ილია მეორის გარდაცვალებასთან დაკავშირებით, საქართველოში გლოვა გამოცხადდა. პატრიარქს კვირას, 22 მარტს სიონის ტაძარში დაკრძალავენ.