თბილისში, სიონის ღვთისმშობლის მიძინების საპატრიარქო ტაძარში ილია II-ის დაკრძალვისთვის მზადება მიმდინარეობს. ტაძარში უკვე დაწყებულია საფლავის გაჭრა, რომელიც კათოლიკოს-პატრიარქის სამუდამო განსასვენებელი იქნება — მისი სურვილის შესაბამისად.
საქართველოს 141-ე პატრიარქს საკურთხევლის გვერდით დაკრძალავენ. ის გახდება მეცხრე პატრიარქი, რომელიც სიონის ტაძარში განისვენებს.
“მთელი მსოფლიოს ძალიან დიდი დანაკარგი და დიდი ტკივილია საქართველოს პატრიარქის, მისი უწმინდესობის, ილია მეორის გარდაცვალება. მისი უწმინდესობის სიცოცხლეშივე ძალიან დიდი სურვილი იყო, რომ სიონის საკათედრო ტაძარში მომხდარიყო მისი დაკრძალვა. მისმა უწმიდესობამ თავისი მოღვაწეობა, როგორც საქართველოს კათოლიკოს-პატრიარქმა სწორედ სიონის უძველესი საპატრიარქო ტაძრიდან დაიწყო და მას უწოდა “მზიანი ღამე”. ამასთან დაკავშირებით ქართველი მღვდელმთავრების აქტიური ჩართულობით შეირჩა სასურველი, საპატიო ადგილი სიონის ჩრდილო-აღმოსავლეთით მდებარე საკურთხევლის შესასვლელთა ამბიონზე, სადაც არის დაბრძანებული ქართველი ერის სათაყვანო სიწმინდე – წმინდა ნინოს ჯვარი და ასევე ივერიის ყოვლადწმინდა ღვთისმშობლის ხატი, რომელიც სწორედ მისი უწმინდესობის დავალებით, ათონიდან 1988 წელს იქნა ჩამობრძანებული” – ამბობს სასულიერო პირი.
ტაძარში დილიდან იმყოფებიან მორწმუნეები — მიმდინარეობს წირვა და პატრიარქის სახელზე პანაშვიდიც გადაიხადეს.