გამოცემა “აგენსტვო”-ს ცნობით, მას შემდეგ, რაც ირანში აიათოლა ალი ხამენეი მოკლეს, პუტინი კრემლში აღარ გამოჩენილა – რუსული სააგენტო წერს, რომ რუსეთის პრეზიდენტი, ვლადიმერ პუტინი საზოგადოების წინაშე 9 დღეა არ გამოჩენილა. სააგენტოს ინფორმაციით, ეს 2026 წლის დასაწყისიდან მისი ერთ-ერთი ყველაზე ხანგრძლივი „გაუჩინარებაა“. “აგენსტვო” ვარაუდობს, რომ პუტინმა კრემლში გამოჩენა შეწყვიტა იმ ცნობების ფონზე, რომლებიც აშშ-ისა და ისრაელის მიერ ირანის ლიდერებზე ნადირობას ეხება.
ბოლო საჯარო ღონისძიება, რომელიც რუსეთის დიქტატორმა კრემლში გამართა, იყო თათბირი ნავთობისა და გაზის მსოფლიო ბაზარზე არსებულ ვითარებაზე 9 მარტს. ამის შემდეგ, ოფიციალური განცხადებების თანახმად, მას კრემლში მხოლოდ გუბერნატორებთან, განათლების მინისტრთან და „სბერბანკის“ ხელმძღვანელთან ჰქონდა შეხვედრები, ასევე გამართა უშიშროების საბჭოს თათბირი ვიდეოკავშირის მეშვეობით.
“ჩინოვნიკებთან შეხვედრები ხშირად არის წინასწარ ჩაწერილი ვიდეოები, ხოლო ვიდეოკავშირით მონაწილეობა პუტინს სხვადასხვა რეზიდენციიდან შეუძლია. მას რამდენიმე იდენტური კაბინეტი აქვს მოწყობილი სხვადასხვა ადგილას“ – წერს გამოცემა
მათივე ცნობით, ოთხშაბათს, 18 მარტს, პუტინმა მთავრობასთან ონლაინ-თათბირი მოსკოვის ოლქში მდებარე ნოვო-ოგარიოვოს რეზიდენციიდან გამართა. ის იმყოფებოდა კაბინეტში, რომლის ზუსტი ასლები შექმნილია სოჭსა და ვალდაიშიც.
გამოცემა “აგენსტვო” დაუზუსტებელ, თუმცა გავრცელებული ცნობების მიხედვით წერს, რომ “სავარაუდოდ, კრემლში შეშინდნენ იმ ფაქტით, რომ 28 თებერვალს მოკლული ალი ხამენეი აშშ-ისრაელმა ქუჩის ვიდეოსამეთვალყურეო კამერების მეშვეობით იპოვეს, მოსკოვში კი ასეთი კამერა გაცილებით მეტია, ვიდრე თეირანში. ინტერნეტის გათიშვაც, პირველ რიგში, სწორედ ამას შეიძლება უკავშირდებოდეს.”