100 ბრალდებიდან როდესაც 99 აღმოჩნდება ტყუილი და 1 მართალი, ეს აჩვენებს პრობლემას, რომ ნდობა არის დაკარგული. ამიტომ, რაც უფრო კეთილსინდისიერად იმუშავებენ მედიები, რაც უფრო ნაკლები იქნება დეზინფორმაცია და ხელოვნური პოლიტიკური სკანდალების გამოგონება, მით უფრო მეტად ექნება პარლამენტს იქნება თუ სხვას, იმისი მოტივაციაც რომ სერიოზულად შეხედოს ამა თუ იმ ნამუშევარს – ასე უპასუხა პაპუაშვილმა “ტვ პირველის” ჟურნალისტის კითხვას რომეო მიქაუტაძესთან დაკავშირებით, თუ რატომ არ სვამდა პარლამენტი, როგორც საზედამხედველო ორგანო მიქაუტაძის საქმიანობაზე კითხვებს მაშინ, როდესაც მის კორუფციული დანაშაულებზე საგამოძიებო რეპორტაჟები კეთდებოდა.
ეკონომიკის მინისტრის ყოფილი მოადგილე რომეო მიქაუტაძე დღეს დამნაშავედ ცნეს ყველა წარდგენილ ბრალდებაში – ცხრავე ეპიზოდში, მათ შორის, უკანონო შემოსავლის ლეგალიზაციაში – ფულის გათეთრება, სამსახურებრივი უფლებამოსილების ბოროტად გამოყენებაში, სამეწარმეო საქმიანობაში უკანონო მონაწილეობასა და სამსახურებრივი უფლებამოსილების გადამეტებაში.
მოსამართლე ნინო გალუსტაშვილმა მას 10-წლიანი პატიმრობა მიუსაჯა. მიქაუტაძეს აეკრძალა სახელმწიფო სამსახურში თანამდებობის დაკავება 2 წლის ვადით. ჩამოერთვა ქონება – ესპანეთისა და მცხეთის სახლები, მისი და მეუღლის კუთვნილი სამი ავტომობილი, საათები, ოქროს ზოდები და მონეტები, ასევე “ნახიდურჰესის” 15%-იანი წილი.