საქართველოში მინის ბოთლებისა და ბოცების იმპორტი 32%-ით გაძვირდა – მთავარი იმპორტიორი რუსეთია – BMG საქსტატის მონაცემებზე დაყრდნობით წერს, რომ 2026 წლის იანვარში საქართველომ 4 მლნ აშშ დოლარის 6 512 ტონა მინის ბოცა, ბოთლები და სხვა ტევადობები შეიძინა, 2025 წლის ანალოგიურ თვეში კი იმპორტმა 3,5 მლნ აშშ დოლარი და 7 518 ტონა შეადგინა.
მინის ბოცებისა და ბოთლების იმპორტი გასულ წელსაც გაძვირდა. ფასის ზრდა დაახლოებით 20%-იანი იყო.
მიმდინარე წლის იანვრის მონაცემების თანახმად, მინის ბოთლებისა და ბოცების იმპორტის უმეტესობა რუსეთზე მოდის, მას მოჰყვება სომხეთი და უკრაინა.
კობახიძის დადგენილებით, 2026 წლის 1 ივლისიდან საზოგადოებრივი კვების ობიექტებს აეკრძალებათ მომხმარებლისთვის პლასტმასის ბოთლებში სასმელების მიწოდება. ხოლო 2027 წლის 1 თებერვლიდან აიკრძალება პლასტმასის ბოთლებში სასმელების წარმოება, იმპორტი და მათი ბაზარზე განთავსება. დადგენილებით განსაზღვრულია გამონაკლისებიც.
აკრძალვა არ გავრცელდება 3 ლიტრი და მეტი მოცულობის სასმელ წყალზე, ასევე 20 ლიტრი და მეტი მოცულობის სასმელებზე, მათ შორის არაალკოჰოლურ და ალკოჰოლურ სასმელებზე. გამონაკლისი შეეხება ასევე საქართველოს შინაგან საქმეთა სამინისტროსა და საქართველოს თავდაცვის ძალებისა და სამხედრო მოსამსახურეების საჭიროებისთვის სასმელი წყლის წარმოებასა და მიწოდებას.