სამოქალაქო აქტივისტი, ორგანიზაციიდან „დემოკრატიის მცველები”, ანა ქართველიშვილი სოციალურ ქსელში ჭავჭავაძის გამზირზე, N359 ავტობუსში მგზავრის დაჭრის ფაქტს დეტალურად იხსენებს:
“საზოგადოებრივ ტრანსპორტში 65 წლის მამაკაცმა ურთიერთშელაპარაკების ნიადაგზე მოქალაქეს ორჯერ ესროლა.
სიტყვიერი დაპირისპირება შენიშვნის ნიადაგზე დაიწყო, როცა ახალგაზრდა ბიჭმა 65 წლის კაცს მიუთითა, რომ მისი ზურგჩანთა უხეშად ეხებოდა მცირეწლოვანს. კაცმა ბოდიში მოიხადა, თუმცა ახალგაზრდა ბიჭი არ შეეშვა.
დაპირისპირება 15-20 წუთი გაგრძელდა, რის შემდეგაც 65 წლის ოთხჯერ ნასამართლევმა კაცმა (მისივე მტკიცებით) ორჯერ ესროლა ახალგაზრდა ბიჭს.
პოლიცია ავტობუსის გაჩერებიდან 6-7 წუთში მივიდა დანაშაულის ადგილზე, ხოლო ადამინმა, რომელმაც მიზანმიმართულად ორჯერ გაისროლა მეორე ადამიანის მისამართით ადგილიდან მშვიდად და აუღელვებლად მიიმალა“, – წერს ქართველიშვილი “ფეისბუქი” – პირად გვერდზე.
შინაგან საქმეთა სამინისტროს ცნობით, სისხლის სამართლის კოდექსის ორი მუხლის (მუხლი 236. ცეცხლსასროლი იარაღის უკანონო შეძენა-შენახვა-ტარება; მუხლი 118. ჯანმრთელობის განზრახ ნაკლებად მძიმე დაზიანება) საფუძველზე ერთი პირი დააკავეს.
დაზარალებული კლინიკაში გადაიყვანეს, მას ქირურგიული ჩარევა დასჭირდა. მის სიცოცხლეს საფრთხე არ ემუქრება.
