საქართველომ 2026 წლის იანვარში ყველაზე მეტი, 25.486 მილიონი დოლარის ღირებულების, 43 502 ტონა ნავთობი და ნავთობპროდუქტი რუსეთისგან იყიდა – ინფორმაციას BPN ავრცელებს და წერს, რომ ირანზე აშშ-სა და ისრაელის მიერ განხორციელებული თავდასხმებისა და საპასუხო იერიშების შემდეგ, ნავთობის ფასები იზრდება.
ამასთან, ჩაკეტილია ჰორმუზის სრუტე, რომელიც ნავთობის 20%-ზე მეტის გამტარია. თეირანის გაცხადებული გეგმით, სურთ დაბლოკონ ნავთობის „ყველა წვეთი“, რათა ფასი მაქსიმალურად გაიზარდოს. ირანი ნავთობის ფასის 200 აშშ დოლარამდე [ბარელზე] გაზრდით იმუქრება. მიმდინარე პროცესების ფონზე ნავთობზრ ფასის ზრდა საქართველოშიც მოსალოდნელია. გამოცემა საქსტატზე დაყრდნობით წერს, რომ საქართველომ 2026 წლის იანვარში 96.726 მლნ აშშ დოლარის [138 718 ტონა] ნავთობი და ნავთობპროდუქტი იყიდა. რაც შეეხება საიმპორტო ფასს, მიმდინარე წლის პირველ თვეში, ლიტრი ნავთობის საიმპორტო ფასმა (გადასახადების გარეშე) 0.59 აშშ დოლარი შეადგინა. აღსანიშნავია, რომ საქართველოში ნავთობისა და ნავთობპროდუქტების მთავარ იმპორტიორ ქვეყნად მიმდინარე წლის დასაწყისშიც რუსეთი რჩება. BPN-ის ცნობით, მიმდინარე წლის იანვრის თვეში საქართველომ ნავთობისა და ნავთობპროდუქტების ყველაზე მეტი მარაგი შემდეგი ქვეყნებიდან შეიძინა:
• რუსეთი – 25.486 მლნ აშშ დოლარის 43 502 ტონა;
• რუმინეთი – 21.242 მლნ აშშ დოლარის 30 865 ტონა;
• საბერძნეთი – 9.528 მლნ აშშ დოლარის 12 809 ტონა;
• კვიპროსი – 8.544 მლნ აშშ დოლარის 11 504 ტონა;
• ბულგარეთი – 7.388 მლნ აშშ დოლარის 10 419 ტონა.