ირანში ყველაფერი განადგურებულია, – ამის შესახებ აშშ-ის პრეზიდენტმა, დონალდ ტრამპმა გერმანიის კანცლერთან, ფრიდრიხ მერცთან შეხვედრისას განაცხადა.
„მათ არ ჰყავთ საზღვაო ფლოტი, ის განადგურებულია, მათ არ ჰყავთ საჰაერო ძალები, ის განადგურებულია, თითქმის ყველაფერი განადგურებულია. ჩვენ ძალიან კარგად ვმუშაობთ, გვყავს შესანიშნავი სამხედრო ძალები და ისინი ფანტასტიკურ საქმეს აკეთებენ“, – განაცხადა ტრამპმა.
კითხვაზე, თუ როგორ მიიღო ირანზე თავდასხმის გადაწყვეტილება, ტრამპმა აღნიშნა, რომ ირანი თავად აპირებდა დარტყმას და მას ეს არ სურდა.
„ჩვენ მოლაპარაკებებს ვაწარმოებდით ამ შეშლილებთან. ისინი პირველები აპირებდნენ თავდასხმას, მე ამას ვგრძნობდი. იმის გათვალისწინებით, თუ როგორ მიდიოდა მოლაპარაკებები, ვფიქრობ, რომ ისინი პირველები გადმოვიდოდნენ შეტევაზე და არ მინდოდა, რომ ეს მომხდარიყო. ისრაელი მზად იყო და ჩვენც მზად ვიყავით“, – განაცხადა ტრამპმა.
აშშ-ის პრეზიდენტის თქმით, ირანმა დაარტყა ქვეყნებს, რომლებსაც არაფერი აქვთ საერთო იმასთან, რაც ხდება.
„ისინი უბრალოდ ბოროტები არიან. საქმე პოლიტიკაში არ არის, ეს მთელი მათი ფილოსოფიაა, ეს საშინელებაა. ეს უბრალოდ ძალიან ბოროტი იდეოლოგიაა და არავის უნახავს მსგავსი რამ. მათ დაარტყეს კატარს, დაარტყეს არაბთა გაერთიანებულ საამიროებს, დაარტყეს საუდის არაბეთს, დაარტყეს ომანს, ისინი გვეხმარებოდნენ მოლაპარაკებებში, და ირანმა ყველას დაარტყა. ისინი გიჟები არიან. მათ რომ ბირთვული იარაღი ჰქონოდათ, გამოიყენებდნენ“, – განაცხადა ტრამპმა.
ამასთან, ტრამპმა აღნიშნა, რომ ირანი უტევს მხოლოდ სამოქალაქო პირებს, სასტუმროებსა და საცხოვრებელ სახლებს.