,,სამედიცინო უნივერსიტეტი უცხოელ სტუდენტებს მთელი კვოტის 5%-ის ფარგლებში მიიღებს, დეფიციტს ბიუჯეტი დაფარავს “-ირაკლი ნატროშვილი

თბილისის სახელმწიფო სამედიცინო უნივერსიტეტის რექტორის განცხადებით, უმაღლესი საგანმანათლებლო დაწესებულება უცხოელ სტუდენტებს ბოლონიის პროცესის ფარგლებში დაშვებული კვოტით მიიღებს, უნივერსიტეტის შემოსავლებში ამ კუთხით არსებულ დანაკლისს კი სახელმწიფო შეავსებს. ამის შესახებ მან მთავრობის ადმინისტრაციაში „შრომის ბაზრის კვლევის“ მოსმენის შემდეგ ჟურნალისტებს განუცხადა.

საქმე ის არის, რომ „უმაღლესი განათლების რეფორმის“ ფარგლებში ხელისუფლების თავდაპირველი გადაწყვეტილებით, სახელმწიფო უნივერსიტეტებს უცხოელი სტუდენტები აღარ უნდა მიეღოთ, რადგან ბიზნესი კერძო სექტორს უნდა ეკეთებინა, სახელმწიფო სექტორს კი სახელმწიფო ამოცანები უნდა შეესრულებინა. თუმცა გასული წელს მიღებული გადაწყვეტილება, წელს მთავრობამ გადაიფიქრა. ირაკლი კობახიძის განცხადებით, სახელმწიფო უნივერსიტეტებში უცხოელი სტუდენტების ჩარიცხვაზე უარის თქმა ქვეყნის ეკონომიკური ინტერესებიდან გამომდინარე არასწორი იქნებოდა.

სამედიცინო უნივერსიტეტის რექტორის თქმით, სახელმწიფოს ეს მიდგომა „აბსოლუტურად სწორია“.

„საერთაშორისო სტუდენტებთან დაკავშირებით ასეთი მიდგომა, რომ სახელმწიფო უნივერსიტეტებში საერთაშორისო სტუდენტების ის კვოტაა დაშვებული, რომელიც ბოლონიის პროცესით არის მოთხოვნილი, იმისთვის, რომ შენარჩუნებული და დაცული იყოს უნივერსიტეტის ინტერნაციონალიზაცია. ეს მთელი კვოტის დაახლოებით 5%-ია. შესაბამისად, დაშვებულია, რომ საერთაშორისო სტუდენტები ამ 5%-ის ფარგლებში გვყავდეს“, – განაცხადა ირაკლი ნატროშვილმა.

კითხვაზე – რამდენით შეუმცირდება ამ გადაწყვეტილებით უნივერსიტეტს შემოსავალი, თსსუ-ს რექტორი პასუხობს, რომ ეს მაჩვენებლები ჯერ არ დაუთვლიათ, რადგან სახელმწიფოს მიდგომით საჭიროების შემთხვევაში უნივერსიტეტს დააფინანსებენ.

„სახელმწიფო გვეუბნება, რომ თუ იქნება საჭიროება, ჩვენ დავაფინანსებთ უნივერსიტეტს. ანუ, რეფორმაზე საუბარი საიდან დაიწყო – ის, სტუდენტის განათლების დღევანდელი დაფინანსება – 2250 ლარი, ეს გრანტი, რეალურად მაღალი ხარისხის განათლებისთვის საკმარისი არ არის. ამიტომ, სახელმწიფო გვეუბნება, უნივერსიტეტის საჭიროებას დააფინანსებს. საერთაშორისო სტუდენტები იქნებიან, რადგან ეს არის ბოლონიის პროცესის აუცილებელი შემადგენელი ნაწილია. დანარჩენ დეფიციტს კი სახელმწიფო შეავსებს“, – განაცხადა ირაკლი ნატროშვილმა.