უკრაინის პრეზიდენტმა, ვოლოდიმირ ზელენსკიმ „ფაინენშალ თაიმსთან“ ინტერვიუში განაცხადა, რომ რუსეთს ომის დასრულების სერიოზული განზრახვა არ გააჩნია და პუტინი მხოლოდ სამშვიდობო პროცესის იმიტაციით ცდილობს უკრაინის პოზიციების შესუსტებას.
„რუსები თამაშობენ და ომის დასრულების სერიოზული განზრახვა არ აქვთ. ისინი თამაშობენ ტრამპთან და მთელ მსოფლიოსთან. პუტინი ფიქრობს, რომ დამაჯერებლად გამოიყურება, არა, ის ცუდი მსახიობია,“ – განაცხადა ზელენსკიმ.
უკრაინის პრეზიდენტმა გააკრიტიკა იდეა, რომ უკრაინის მიერ დონბასის დათმობა ომს დაასრულებს. მისი თქმით, ეს „გულუბრყვილო“ წარმოდგენაა, რადგან „რუსეთის ნდობა არ შეიძლება“.
ვოლოდიმირ ზელენსკი ეწინააღმდეგება ცეცხლის მხოლოდ დროებით შეწყვეტასაც. მისი თქმით, გარანტიების გარეშე რუსეთი ამ პაუზას ძალების აღსადგენად გამოიყენებს.
„ჩვენ პაუზა არ გვჭირდება. ჩვენ ომის დასასრული გვჭირდება,“ – აღნიშნა ზელენსკიმ.
უკრაინის პრეზიდენტმა ასევე განაცხადა, რომ ამჟამად დონალდ ტრამპის ზეწოლა უკრაინაზე გაცილებით მძიმეა, ვიდრე რუსეთზე, თუმცა იმედი გამოთქვა, რომ ვაშინგტონი პოზიციას შეიცვლის.
ამასთან, ვოლოდიმირ ზელენსკიმ ევროკავშირს მოუწოდა, უკრაინის ბლოკში გაწევრიანების კონკრეტული თარიღი დაადგინოს.
„მინდა თარიღი. ვითხოვ ამას. ჩვენ არ შეგვიძლია, დავუშვათ, რომ მომავალი თაობა ისეთ სიტუაციაში აღმოჩნდეს, როდესაც რუსეთი 50 წლით დაბლოკავს უკრაინის ევროკავშირში გაწევრიანებას“, – განაცხადა ზელენსკიმ.