ჩვილის მდგომარეობა, რომელსაც გუშინ ბათუმის სამშობიაროში დედამ სახისა და ყელის არეში დაზიანებები მიაყენა, უმძიმესია. როგორც “მედინას” კლინიკურმა დირექტორმა, ჯუმბერ უნგიაძემ განაცხადა, ახალშობილს რამდენიმე ოპერაცია დასჭირდება.
“კონსილიუმი შედგა წამყვან ექიმებთან ერთად. დღეს ჩამოდის ბავშვთა ყბა – სახის ქირურგი, მეორე ოპერაციას გააკეთებს. დასჭირდება რამდენიმე ოპერაცია, მაგრამ სიტუაცია უმძიმესია. მძიმე ტრავმით სასიცოცხლო ორგანოებზე, თავზე, სასუნთქ გზებზე, ხორხზე, ქვედა ყბაზე. არის ინფექციაც, რადგან როგორც მოგეხსენებათ საპირფარეშოში იმშობიარა. უმძიმესი პაციენტია, სულ რამდენიმე შემთხვევაა აღწერილი ასეთი მსოფლიოში, მაგრამ ყველაფერს ვაკეთებთ იმისთვის რომ ბავშვი გადარჩეს” – ამბობს ექიმი.
ქალის მდგომარეობას ექიმი ამ ეტაპზე სტაბილურად აფასებს და გართულებებს არ ელოდება.
გუშინ ბათუმის ერთ-ერთ კლინიკაში სანიტარმა საპირფარეშოში იმშობიარა და ახალშობილს ყელისა და სახის არეში დაზიანებები მიაყენა. სანიტარმა ახალშობილი პოლიეთილენის პარკში მოათავსა, რის შემდეგაც მის მოშორებას აპირებდა. მომხდართან დაკავშირებით გამოძიება სსკ-ის 11 პრიმა 19-109-ე მუხლის ე” და”კ” ქვეპუნქტებით მიმდინარეობს, რაც ოჯახის წევრის მიმართ, ახალშობილის განზრახ მკვლელობის მცდელობას გულისხმობს.