უცხოელებისთვის შრომითი საქმიანობის უფლების მოთხოვნის საფასური 200 ლარი, დაჩქარებული წესით კი 400 ლარი იქნება – დადგენილების მიხედვით, შრომითი საქმიანობის უფლების გაცემის მომსახურების საფასური დიფერენცირებულია ვადის მიხედვით და შეადგენს:
შრომითი საქმიანობის უფლების მოთხოვნა – განცხადებისა და სავალდებულო დოკუმენტაციის სრულად წარდგენიდან 30-ე კალენდარულ დღეს გაცემისას – 200 ლარს;
შრომითი საქმიანობის უფლების მოთხოვნა – განცხადებისა და სავალდებულო დოკუმენტაციის სრულად წარდგენიდან მე-10 სამუშაო დღეს გაცემისას – 400 ლარს;
შრომითი საქმიანობის უფლების ვადის გაგრძელება – განცხადებისა და სავალდებულო დოკუმენტაციის სრულად წარდგენიდან არაუმეტეს 30-ე კალენდარულ დღისა − 200 ლარს
აღნიშნულ გადასახადს ადგილობრივი დამსაქმებელი იხდის, თვითდასაქმებულ უცხოელზე შრომითი საქმიანობის უფლების გაცემის მომსახურების საფასურს – უშუალოდ უცხოელი.
კანონი ეხებათ იმ უცხოელებს, რომლებსაც საქართველოში მუდმივი ბინადრობის უფლება არ აქვთ და დასაქმება ფინანსური სარგებლის მიღების მიზნით სურთ.
ოცნების გადაწყვეტილებით, შრომითი საქმიანობის უფლებას დასაქმების ხელშეწყობის სახელმწიფო სააგენტო გასცემს. [ BPN]
ქართულმა ოცნებამ მუდმივი ბინადრობის არმქონე უცხო ქვეყნის მოქალაქეებს კურიერებად, ტაქსის მძღოლებად და გიდებად მუშაობა აუკრძალა. კობახიძის ხელმოწერილი დადგენილებით, აღნიშნულ საქმიანობებზე ნულოვანი კვოტა დაწესდა.
დადგენილების თანახმად, საქართველოში მუდმივი ბინადრობის ნებართვის არმქონე ნებისმიერ უცხოელს, რომელსაც სურს იმუშაოს კურიერად, ტაქსის მძღოლად ან სხვა ტიპის მომსახურების სფეროში, ესაჭიროება ჰქონდეს “შრომით საქმიანობის უფლება”. ამ უფლების გაცემაზე პასუხისმგებელი კი დასაქმების ხელშეწყობის სახელმწიფო სააგენტოა.
ხოლო მათთვის კი ვინც უკვე მუშაობს საქართველოში, დაწესდა გარდამავალი პერიოდი: თვითდასაქმებული კურიერებისა და მძღოლებისთვის აღსრულების მექანიზმი 2026 წლის პირველი მაისიდან გავრცელდება, ხოლო იმ რეგისტრირებულ იმიგრანტებზე, რომლებიც უკვე ბაზაში არიან, სტატუსის მოსაწესრიგებლად ვადა 2027 წლის პირველ იანვრამდე მიეცემათ.