პროტესტის ერთ-ერთი აქტიური მონაწილე, ლაშა გაბიტაშვილი თბილისის საერთაშორისო აეროპორტში – პასპორტ-კონტროლისას ახსნა-განმარტებების გარეშე დააყოვნეს. დაახლოებით, 2 საათის განმავლობაში ალოდინეს, რა დროსაც მისი რეისი გაფრინდა, მას კი წასვლის შესაძლებლობა არ მიეცა.
აქტივისტის განმარტებით, მესაზღვრეები რაიმე დარღვევას ეძებდნენ, თუმცა წარუმატებელი მცდელობის შემდგომ, მისი კუთვნილი ისრაელის პასპორტი დაუბრუნეს და საზღვარი გადააკვეთინეს.
აეროპორტში მოქალაქის შეფერხება ტექნიკური ხარვეზით ახსნეს და მგზავრს სანაცვლოდ, იმავე მიმართულებით, პარიზში, სამშაბათ დღეს გაფრენა შესთავაზეს. გაბიტაშვილი მომხდარს „ოცნების“ მხრიდან გაძლიერებულ რეპრესიებს უკავშირებს.
ლაშა გაბიტაშვილს 2025 წლის იანვარში აბუ-დაბიში „ქართული ოცნების“ დეპუტატები-ირაკლი ზარქუა და ვიქტორ სანიკიძე ფიზიკურად დაუპირისპირდნენ. საქართველოში დაბრუნებულს 2025 წლის თებერვალში კი მას სამი ნიღბიანი პირი დაესხა თავს.