მოსამართლე ვალერიან ბუგიანიშვილმა გიორგი გახარიას წინააღმდეგ “ჩორჩანას საქმეში” ცხინვალის საოკუპაციო რეჟიმის პროპაგანდისტული მედიის სტატია მტკიცებულებად დაუშვა. საუბარია სააგენტო “რესაზე” გამოქვეყნებულ სტატიაზე, სადაც ჩორჩანას საგუშაგოს ირგვლივ განვითარებული მოვლენები რუსული მხრიდან არის დანახული და შეფასებული. ეს სტატია პროკურატურამ “ჩორჩანას საქმეში” ახალ მტკიცებულებად ჩადო.
ასევე მოსამართლემ გიორგი გახარიასთვის შეფარდებული პატიმრობა ძალაში დატოვა.
მოსამართლემ აღნიშნული გადაწყვეტილებით ბრალდების მხარის შუამდგომლობა დააკმაყოფილა.
ცნობისთვის, პროკურატურის განცხადებით, გიორგი გახარიამ საოკუპაციო ხაზის გასწვრივ სოფელ ჩორჩანასთან დამატებითი საპოლიციო საგუშაგოს აღმართვის შესახებ გადაწყვეტილება ერთპიროვნულად მიიღო. როგორც ბრალდება განმარტავს, აღნიშნული ქმედებები საოკუპაციო რეჟიმის წარმომადგენლებმა საქართველოს ტერიტორიული მთლიანობის წინააღმდეგ მიმართული მოქმედებების საბაბად გამოიყენეს. კერძოდ, 2019 წლის 5 სექტემბერს, ცხინვალის დე-ფაქტო რეჟიმის უკანონო შეიარაღებულმა ფორმირებებმა სიმაღლეები დაიკავეს საქართველოს ხელისუფლების მიერ კონტროლირებად ტერიტორიაზე.
აღსანიშნავია, რომ ე.წ. ჩორჩანას ეპიზოდის გარდა, ყოფილი პრემიერ-მინისტრის, გიორგი გახარიას წინააღმდეგ სისხლის სამართლებრივი დევნა მეორე საქმეზეც – 20 ივნისის აქციის დარბევის ეპიზოდზეც მიმდინარეობს.