ხელჩართული ჩხუბი, ჩალეწილი მანქანები და დაკავებების სერია საქალაქო სასამართლოსთან ლევან ჯანგველაძის მკვლელობის საქმის განხილვის პარალელურად დაიწყო. მაშინ, როცა სხდომათა დარბაზში ბრალდების მტკიცებულებებს იკვლევდნენ, სასამართლოს მიმდებარედ შეკრებილი ჯანგველაძის მხარდამჭერები, ძმები მიქაძეების საგულშემატკივროდ მისულებს დაუპირისპირდნენ. ვითარება იმდენად დაიძაბა, რომ დაპირისპირებული მხარეების გაშველება პოლიციამაც ვერ შეძლო. რის შემდეგაც დაიწყო დაკავებების სერია.
შეტაკებების გამო საქალაქო სასამართლოსთან დღეს, ანდრონიკაშვილის ქუჩა პარალიზებული იყო. დაპირისპირების მონაწილეთა ნაწილი ტერიტორიის დატოვებას მანქანით ცდილობდა, რა დროსაც მათ გზა გადაუკეტეს და მანქანის საქარე მინები ჩაულეწეს. ლევან ჯანგველაძის მკვლელობის საქმის პროცესის პარალელურად გინება და ჩხუბი აქამდეც იყო, თუმცა მანქანების ჩალეწვამდე და ხელჩართულ ჩხუბამდე საქმე არ მისულა.
კრიმინალური პოლიციის მობილიზება სასამართლოში დილიდანვე დაიწყო. მაშინ, როცა ყველაზე მკაცრი რეჟიმის ციხიდან გიორგი მიქაძე პროცესზე მოიყვანეს, ანდრონიკაშვილის ქუჩა უკვე სამართალდამცავებით იყო გადავსებული. დღეს ბრალდების მხარემ 4 მოწმე დაკითხა. მათ შორის გამომძიებელი, ექსპერტი და იმ სასტუმროს თანამშრომლები, ვინც ძებნილი გიორგი ჯოხაძის და გელა უძიალურის შეხვედრები დაადასტურა.