რადიოსადგურის „ეხო მასკვი“ («Эхо Москвы) ყოფილ მთავარ რედაქტორს ალექსეი ვენედიკტოვს სახლის კართან ღორის თავი, კარზე კი უკრაინის გერბი ანტისემიტური წარწერით („Judensau“ (ებრაელი ღორი) დაუტოვეს. ამის შესახებ ვენედიკტოვი საკუთარ ტელეგრამ არხის მეშვეობით იტყობინება.
ამასთან, მან გამოაქვეყნა ფოტო, სადაც ჩანს მიტანის ერთ-ერთი სერვისის – Delivery Club-ის ფორმაში გამოწყობილი პირი, რომელიც კართან დატოვებულ ფაქტებს ფოტოს უღებს.
„ნოვაია გაზეტას“ (Новая Газета) ცნობით, კომპანიაში განაცხადეს, რომ აღნიშნული პირს მოძველებული ფორმა აცვია, რომელსაც კომპანია უკვე 2 წელია აღარ გასცემს. ამასთან, კომპანიის განცხადების თანახმად, ვენედიკტოვის საცხოვრებელი ადგილიდან შეკვეთა არ მიუღიათ.
„მათ ჩემი და ჩემი ოჯახის შეშინება გადაწყვიტეს? ჩემი, რომელიც დუდაევის ბოევიკებმა წამიყვანეს დასახვრეტად?“, – დაწერა ალექსეი ვენედიკტოვმა, მის კართან დატოვებული ღორის თავის ფოტოს აღწერაში.
უკრაინაში ომის დაწყების შემდეგ, მარტის დასაწყისში “ეხო მასკვი“-ს ყოფილმა მთავარმა რედაქტორმა განაცხადა, რომ მან და მისმა ოჯახმა მუქარის შემცველი ასზე მეტი შეტყობინება მიიღეს.
ფოტო ვენედიკტოვის ტელეგრამ არხიდან
ინფორმაციისთვის, “ეხო მასვკი” უკრაინაში ომის დაწყების შემდეგ დაიხურა. აღნიშნული გადაწყვეტილება კომპანიამ „გაზპრომ-მედია“ (მის შემადგენლობაში შედის რადიოსადგური „ეხო მასკვი“), მას შემდეგ მიიღო, რაც რუსეთის პროკურატურამ განაცხადა, რომ გამოცემა „განზრახ ცრუ ინფორმაციის ავრცელებს რუსეთის მიერ წარმოებული სპეციალური ოპერაციის შესახებ, რომელიც დონეცკის და ლუგანსკის რესპუბლიკების დაცვას ისახავს მიზნად“.
აღნიშნული განცხადების შემდეგ დაბლოკეს როგორც „ეხო მასკვის“, ასევე, ოპოზიციური ტელეარხ „დოჟდის“ საიტები.