აშშ-მა უკრაინას უსაფრთხოების 15-წლიანი გარანტიები შესთავაზა, თუმცა კიევი უფრო ხანგრძლივ ვადას ითხოვს, – ამის შესახებ განცხადება უკრაინის პრეზიდენტმა, ვოლოდიმირ ზელენსკიმ გააკეთა.
მიუნხენის უსაფრთხოების კონფერენციის ფარგლებში ზელენსკიმ თქვა, რომ ამერიკელ სენატორებთან შეხვედრისას აშშ-თან შესაძლო შეთანხმება განიხილა.
„ჩვენ ძალიან გვინდა უსაფრთხოების გარანტიების ვადის გაზრდა, რათა ისინი ინვესტორებისთვის უფრო ეფექტიანი იყოს. ახლახან გვქონდა შეხვედრა ინვესტორებთან, ბიზნესთან და მათთვის საჭიროა გარანტიები, რომლებიც ხუთ, ათ წელზე მეტხანს იმოქმედებს და ასე შემდეგ. დღეს ამერიკული მხარისგან გვაქვს წინადადება 15-წლიან გარანტიებთან დაკავშირებით. ჩვენ გვინდა 20 წელი და მეტი: 30, 50. რას დათანხმდება აშშ-ის ადმინისტრაცია და კონგრესი, ამას ვნახავთ“, – განაცხადა ზელენსკიმ.
უკრაინა ამტკიცებს, რომ ომის შეწყვეტის შესახებ ნებისმიერი შეთანხმების შემთხვევაში მან უნდა მიიღოს აშშ-ისა და სხვა დასავლელი მოკავშირეებისგან უსაფრთხოების სანდო გარანტიები, რათა რუსეთის მხრიდან ხელახალი შეჭრა შეუძლებელი გახდეს.
მანამდე ზელენსკი აცხადებდა, რომ აშშ-თან უსაფრთხოების გარანტიების შეთანხმება „100 პროცენტით მზადაა“, თუმცა ამ კვირაში აღიარა, რომ მისი ზოგიერთი პუნქტი კვლავ შეუთანხმებელია.
გამოცემა „პოლიტიკოს“ წყაროების ცნობით, აშშ არ აპირებს ამ შეთანხმების ხელმოწერას, ვიდრე უკრაინა რუსეთთან ომის დასრულების პირობებზე შეთანხმებას არ მიაღწევს