გადაწყვეტილების მიღებამდე 10 წუთით ადრე სანდრო წივწივაძე მოსამართლეს მის სიმართლეში არწმუნებდა. 28 წლის ბიჭი 8 წლით ციხეში იარაღის გასაღებისა და გამოძიებისთვის ცრუ ინფორმაციის მიწოდების მუხლებით გაუშვეს. გადაწყვეტილება მოსამართლე ირაკლი ხუსკივაძემ 9 თვიანი სასამართლო განხილვის შემდეგ მიიღო. პროკურატურის მტკიცებით, იარაღი რომლითაც გელა უძილაურმა ლევან ჯანგველაძე მოკლა სანდრო წივწივაძეზე იყო რეგისტრირებული.
როგორ აღმოჩნდა ქილერის ხელში სანდრო წივწივაძის ცეცხლსასროლი იარაღი? – პროკურატურა ამტკიცებს, რომ წივწივაძემ ცეცხლსასროლი იარაღი მკვლელობის ორგანიზებაში ბრალდებულ გიორგი ჯოხაძეს და გიორგი კაჭკაჭაშვილს გადასცა. ამის დამადასტურებელ მტკიცებულებად გამოძიებამ საქმეში ვიდეოც ჩადო. კადრები, რომელიც უკრაინაში 2019 წელს არის მოდიფიცირებული და ასახავს ჯოხაძე-წივწივაძის დიალოგს იარაღზე.
სანდრო წივწივაძეს მოსამართლემ მაქსიმალური სასჯელი განუსაზღვრა. მოტივად ირაკლი ხუსკივაძემ დანაშაულით განპირობებული მძიმე შედეგი დაასახელა, გადაწყვეტილების საფუძვლად კი ოპერატიული აუდიო მტკიცებულება დაუდო. საუბარია, სანდრო წივწივაძის სახლში ფარულად ჩაწერილ აუდიო-ფაილზე, სადაც ბრალდებულის ძმა იარაღების გასხვისების “გალევების” სქემაზე დეტალურად საუბრობს.