რა თქმა უნდა, ვფიქრობთ იდეაზე, რომელიც გუშინ იქნა წამოყენებული – უნდა ვიფიქროთ, როგორც შეიძლება მოწესრიგდეს, როცა ადგილი აქვს კონსტიტუციური წყობის და წესრიგის წინააღმდეგ ექსტრემისტულ გამოვლინებას! ჩვენ ამაზე ვმსჯელობთ და ჩვენი მიდგომები დემოკრატიის და კონსტიტუციური წყობის დაცვის მიზანს ეფუძნება, – ასე უპასუხა შალვა პაპუაშვილმა კითხვას, განიხილავს თუ არა „ქართული ოცნება“ სისხლის სამართლის პასუხისმგებლობის დაწესებას იმ პირების წინააღმდეგ, რომლებიც კონსტიტუციური ორგანოების ლეგიტიმაციას საჯაროდ არ აღიარებენ.
პაპუაშვილის განცხადებით, სურთ, მოსახლეობას ჩაუნერგონ იდეოლოგია, რომ კონსტიტუციური ორგანოები არ არსებობენ და ძალაუფლება არის ქუჩაში, რომელსაც აღება სჭირდება.
მისივე თქმით, ეს არის ექსტრემიზმი. პაპუაშვილმა ამ კონტექსტში “რაიხსბიურგერების მოძრაობასთან“ დაკავშირებით გერმანიის მაგალითზე ისაუბრა.
“ჩვენი საკანონმდებლო რეგულაციები არის რეაქცია. ჩვენ ვაკვირდებით და ყველა იმ საკითხს ვაწესრიგებთ, რაც არის პრობლემური ჩვენი საზოგადოებისთვის, კონსტიტუციური წყობისთვის და საზოგადოების უსაფროებისთვის.
რა თქმა უნდა, ჩვენ ვფიქრობთ იდეაზე, რომელიც გუშინ იქნა წამოყენებული. არის ექსტრემიზმი და ექსტრემისტულს მიდგომებს სახელი უნდა დაერქვას. ამ მხრივ, გერმანიის მაგალითი გვაქვს, როცა არის ერთი-ერთში იდენტური სიტუაცია.
გერმანიაში ე.წ. “რაიხსბიურგერების მოძრაობა“, რომელსაც 20 000 მიმდევარი ჰყავდა, გერმანიის იუსტიციის მინისტრმა ერთ დღეში დახურა. ოთხი კაცი, მათ შoრის ხელმძღვანელი დაიჭირეს. გერმანიაში ბრალდება არის ის, რომ კონსტიტუციურ ორგანოებს არ აღიარებენ – საქართველოშიც კონსტიტუციურ ორგანოებს არ აღიარებენ და ქმნიან პარალელურ სტრუქტურებს. გერმანიაში ადამიანი ამბობდა, რომ იყო გერმანიის მეფე. ჩვენ აქ ერთი ქალბატონი გვყავს, რომელიც ამბობს, რომ არის საქართველოს პრეზიდენტი და პრეზიდენტის შტანდარტი უდგას ხოლმე. კარგია, რომ მას ბოლო პერიოდში ელჩები აღარ ხვდებიან, მაგრამ მასთან ელჩები მიდიოდნენ და თვითმარქვია პრეზიდენტს პრეზიდენტის შტანდარტი ედგა. აქაც სავარაუდოდ მეფობა სურს ადამიანს, ვინც ამბობს, რომ არის პრეზიდენტი. გერმანიაშიც იყო მოწოდება გადასახადების არგადახდაზე. იგივე გვესმოდა ჩვენ საქართველოში. გერმანიაში პარალელური სტრუქტურები, დარბაზები იქმნებოდა. აქაც პარალელური პარლამენტი და დარბაზების შექმნას ცდილობდნენ. გერმანიაში იყო ძალადობა, მუქარა მოსამართლეების, პოლიციელების და საჯარო მოხელეების მიმართ. ხომ არ გვახსენდება საქართველოში მოსამართლეების, პოლიციელების და საჯარო მოხელეების მიმართ მუქარა?
ექსტრემიზმი და შიდა ტერორიზმი გამოწვევაა ყველა ქვეყნისთვის და ყველა სახელმწიფო ამას ებრძვის.
ვნახოთ, არის იდეა – რა ფორმულებით იქნება და რას გადაწყვეტს პარლამენტი“, – განაცხადა შალვა პაპუაშვილმა.
შეგახსენებთ, რომ იურიდიულ საკითხთა კომიტეტის თავმჯდომარის, არჩილ გორდულაძის განცხადებით, შესაძლოა, კანონით განისაზღვროს და სისხლის სამართლებრივი პასუხისმგებლობა დაეკისროს პირს, რომელიც საჯარო მოწოდებას გააკეთებს კონსტიტუციური ორგანოების არცნობის შესახებ. გორდულაძემ აღნიშნული განცხადებით, პარლამენტის გუშინდელ სხდომაზე, დეპუტატ ლევან მაჭავარიანს უპასუხა, რომელმაც სესიაზე დასვა კითხვა, ხომ არ უნდა იფიქროს პარლამენტმა რაიმე ტიპის სანქციებზე იმ პოლიტიკური ჯგუფების თუ აქტივისტების მიმართ, რომლებიც არ აღიარებენ არჩეული ხელისუფლების ლეგიტიმურობას, ქმნიან პარალელურ სახელისუფლებო სტრუქტურებს, ბოიკოტს უცხადებენ ხელისუფლების გადაწყვეტილებებს, ხელს უშლიან პოლიციას მუშაობაში, ამტკიცებენ, რომ ქვეყანა ოკუპანტი ძალის მიერ იმართება და სხვებსაც მოუწოდებენ ანალოგიური ქმედებებისკენ.