„მნიშვნელოვანია, რომ NATO-ს გენერალური მდივანი ჩვენთან ერთად იმყოფება უკრაინაში ომის ამ მძიმე მომენტში, როდესაც რუსეთმა კიდევ ერთხელ უგულებელყო ამერიკული მხარის ძალისხმევა. დღეს რუსეთმა ბალისტიკური იარაღის რეკორდული რაოდენობა გამოიყენა. იყო 28 ფრთოსანი რაკეტა, ასევე კიდევ 43 სხვადასხვა ტიპის რაკეტა, რომლებიც მიზანს ბალისტიკური ტრაექტორიით უახლოვდებიან და მათი ჩამოგდება მხოლოდ „პატრიოტის“ სისტემით არის შესაძლებელი. ეს ნიშნავს, რომ საჭიროა რაკეტები ამ სისტემებისთვის და მათი ოპერატიული მოწოდება. მარკთან დღეს, მათ შორის, ამ საკითხზეც ვისაუბრეთ და იმედი მაქვს, ყველაფერი, რაზეც შევთანხმდით, განხორციელდება.“ – წერს უკრაინის პრეზიდენტი ვოლოდიმირ ზელენსკი სოციალურ ქსელში და უკრაინაში NATO-ს გენერალური მდივნის მარკ რუტეს ვიზიტის ამსახველ კადრებს ავრცელებს.
გასულ ღამეს რუსეთმა უკრაინა ბალისტიკური რაკეტებითა და დრონებით დაბომბა – არის მსხვერპლიც. დარნიცკის, დესნიანსკის, დნეპროსკის, პეჩერსკისა და შევჩენკოვსკის რაიონებში დაზიანებულია საბავშვო ბაღები და ინფრასტრუქტურა. ეს კი იმ დროს, როცა ამერიკის პრეზიდენტი დონალდ ტრამპი ამბობს, რომ მან პუტინს სთხოვა, ძლიერი ყინვისა და სიცივის გამო, უკრაინა ერთი კვირის განმავლობაში არ დაებომბა, რაზეც პუტინი დათანხმდა.
დღეს რუსეთმა ბალისტიკური იარაღის რეკორდული რაოდენობა გამოიყენა – ზელენსკი
