პოლიციელის ცემის ფაქტზე ბრალდებულები ოზურგეთის სასამართლომ წინასწარ პატიმრობაში გაუშვა. ლუკა ჩხიკვაძეს და დავით სიმონიშვილს პროცესზე ერთი სიტყვა არ უთქვამთ. არც ბოდიში მოუხდიათ სამართალდამცველისთვის, რომელიც მხოლოდ იმიტომ სცემეს რესტორანში , რომ ქურდული სამყაროს მიმართ პატივისცემა არ გამოხატა.
სხდომაზე პროკურორმა დეტალურად აღწერა ჩხუბის დაწყების დეტალები და თქვა, რომ ჩხუბი ლუკა ჩხიკვაძემ დაიწყო, რომელსაც ჯერ დავით შარაშიძე, შემდეგ კი დავით სიმონიშვილი შეუერთდნენ.
ადვოკატების მტკიცებით კი, ჩხუბი პოლიციელმა დაიწყო, რადგან პირველი მან მიაყენა შეურაცხყოფა ლუკა ჩხიკვაძეს.
ჩხიკვაძის ადვოკატის თქმით, გადაწყვეტილებას აუცილებლად გაასაჩივრებს.
სასამართლო პროცესზე კი არ დადასტურდა რომ ინიციატორი ჩხუბის დაწყების იყო ჩემი დაცვის ქვეს მყოფი, არამედ ეს იყო ბრალდების მხარის შუამდგომლობა. შესაბამისად, სისხლის სამართლის საქმის მასალებში, ნათლად ჩანს თუ ვინ იყო ჩხუბის დაწყების ინიციტორი და ეს იყო მეორე მხარე. დაზარალებულმა მოახდინა პროვოცირება, რადგან სიტყვიერი შეურაცხყოფა მიაყენა მათ, – განაცხადა ადვოკატმა.
დაპირისპირებაში მონაწილეობდა “ქართული ოცნების“ წევრი, ჩოხატაურის ადგილობრივი ორგანიზაციის თავმჯდომარე, თუმცა ის ახლა გირაოთი გარეთ იმყოფება.
ოპოზიციის წარმომადგენლები ამბობენ, რომ ოზურგეთის რაიონის სასამართლოში მომხდარი ფაქტი, კიდევ ერთხელ ამტკიცებს, როგორი შერჩევითი სამართალია ქვეყანაში.
ქვეყანაში რომ სამართალი არ არსებობს, დიდი ხანია ვიცით, მაგრამ შერჩევითი სამართალი თავად „ქოცებს“ აქვთ შიგნით და ამის ნათელი დადასტურება ვნახეთ სასამართლო პროცესზე, როდესაც ვიხილეთ, როგორ სცემა მოქმედმა საკრებულოს თავმჯდომარემ კრიმინალებთან და ქურდული სამყაროს წარმომადგენლებტან ერთად პოლიციელს და შემდეგ ეს საკრებულოს თავმჯდომარე სახლშია, გირაოთი, ის ადამიანები კი, ვისთან ერთადაც შარაშიძე სუფრასთან იჯდა, პატიმრობაში არიან, – განაცხადა თათია ნიკოლაშვილმა.
საქმის მასალების მიხედვით, 29 იანვარს, ოზურგეთში მდებარე ერთ-ერთ რესტორანში, ურთიერთშელაპარაკების ნიადაგზე, ჩოხატაურის საკრებულოს თავმჯდომარემ და მასთან ერთად მყოფმა ორმა მოქალაქემ ჯგუფურად იძალადეს პოლიციელ გოგა ჯინჭარაძეზე, რომელიც ამავე რესტორანში იმყოფებოდა.
პოლიციამ თავდაპირველად ჩოხატაურის საკრებულოს უკვე ყოფილი თავმჯდომარე, დავით შარაშიძე დააკავა. მას სასამართლომ აღკვეთის ღონისძიების სახით 30 000 ლარიანი საპატიმრო გირაო შეუფარდა.