პოლიტიკური პარტია „სამართლიანობისთვის“ ლიდერი, ეკა ბესელია, აცხადებს, რომ მისი შვილის, რატი მილორავას დაკავების საქმეში რამდენიმე პოლიციელის მხრიდან სისხლის სამართლის დანაშაულის ნიშნები იკვეთება. ბესელიას თქმით, აღნიშნულ ფაქტებზე პასუხისმგებელი პირები აუცილებლად დადგინდებიან, საქმე კი არა მხოლოდ ზემდგომ ინსტანციებში, არამედ ადამიანის უფლებათა ევროპულ სასამართლოშიც გადაიგზავნება.
გამოჩნდა კადრებში, რომ სისხლის სამართლის დანაშაული აქვთ ჩადენილი რამდენიმე პოლიციელს, რომელსაც აუცილებლად დავადგენ. აუცილებლად ამ საქმეს წავიღებ არა მარტო ზემდგომ ინსტანციაში, არამედ ამ საქმეს აუცილებლად გავაგზავნი ევროპულ სასამართლოში. არ აქვთ იმის გამბედაობა, სიმამაცე, იმიტომ, რომ არიან მხდლები, მშიშრები, სახელმწიფოს დამაზიანებლები, იმიტომ, რომ ჩემთან დაკავშირებით მე მელაპარაკო პირადად, მე გამისწორო თვალი და არ გადაიტანონ ისრები ოჯახის წევრებზე. ამის თავი და გამბედაობა არც იმ რეჟიმს ჰქონდა, არც ამ რეჟიმს არ აქვს, – ამბობს ბესელია.
“პირველებმა” რატი მილორავას დაკავების ის ვიდეოკადრები მოიპოვა, რომელიც საქმეში დევს. 40 წუთიანი სამხრე კამერების ჩანაწერების გაშიფვრის შემდეგ დგინდება, რომ მილორავას ერთი საპატრულო ეკიპაჟი აჩერებს, რის შემდეგაც ადგილზე კიდევ რამდენიმე ეკიპაჟი მიდის.
ჩანაწერში ისმის მილორავას ხმაც, რომელიც პოლიციელებს ძალადობაზე მიუთითებს და ეუბნება, რომ მათ დაემორჩილება. დაკავებული სთხოვს სამართალდამცველებს, რომ ხელბორკილი გაუხსნან, რადგან გაუსაძლის ტკივილს გრძნობს.
შეგახსენებთ, რომ პოლიტიკური პარტია „სამართლიანობისთვის” ლიდერის, ეკა ბესელიას ვაჟი რატი მილორავა მოსამართლე
მანუჩარ ცაცუამ 5 დღიან ადმიმისტრაციულ პატიმრობაში გაუშვა.