გაფიცვის მეხუთე დღე რუსთავის აზოტის ქარხანაში – დასაქმებულები ამ დრომდე ხელფასების სამასი ლარით გაზრდას ითხოვენ, თუმცა ადმინისტრაცია ჯერ დათმობაზე არ მიდის. ამასთან, ირკვევა, რომ გაფიცულებს ქარხნის ხელმძღვანელობა სასამართლოში ჩივილით ემუქრება.
“არ გვაწყობს 4%-ის მომატება. გვინდა, რომ მოჭრილად რასაც ვითხოვთ, ეს დაგვიმატონ. თუ ამ ხალხის აქ ყოფნა და მუშაობა უნდათ, კონტაქტი დაამყარონ ხალხთან, გამობრძანდნენ, გვეუსაბრონ, გაითვალისწინონ ჩვენი აზრიც და შეთანხმებულად ვიმოქმედოთ. ჩვენ აქ სამტროდ არავინ ვართ მოსული. ფასების ზრდაა პროდუქტებზე, წამლებზე, ამდენი მომატებაა და 39 ლარის და 40 თეთრის მომატება ცოტა დამამცირებელია”, – ამბობს პროტექსტის მონაწილე.
“მუშაობდა ჟანგბადი ანუ ჩვენგან შეფერხება არ არის. თითო კაცი, ყველა ვარიანტში, სადაც ისეთი ცეხებია, აუცილებელი და სიცოცხლისთვის საშიში, ყოველთვის არის მორიგე, ცვლის უფროსი და არ არის უყურადღებოდ მიტოვებული. ზოგ ტერიტორიაზე ძალიან სამარცხვინო პირობებია, არის ცეხები, სადაც ჭურჭელს ტუალეტში რეცხავენ, ძალიან ცუდი პირობები და ამ პირობებში რომ ხალხი მუშაობს და გემსახურება, ელემენტალურად, პატივისცემას და დაფასებას მაინც იმსახურებს”, – ამბობს პროტესტის მონაწილე.